Heç kimə sirr deyil ki, çoxları ali məktəbi  bitirib, nazir, prokuror, rəis, baş həkim olmaq istəyir.

Qoy olsunlar! Burada pis heç nə yoxdur. Ancaq reallıqla razılaşmaq lazımdır. Hüquq fakültəsini bitirən hər məzun təbii ki, prokuror, rəis ola bilməz. Çünki ölkəmizdə  60 rayon var və 60 rayona da uzaqbaşı 120 prokuror, rəis təyin edilə bilər. Hansı ki, hər ali məktəblərin hüquq fakültəsini yüzlərlə məzun bitirir. Onların əksəriyyəti isə ixtisasına uyğun  iş tapa bilmir.

Heç adi vəkil kimi fəaliyyət göstərə bilmir.Bunun üçün ən azından yenidən imtahan verib, müsahibədən  keçməlidirlər.  Bu da bir o qədər də  asan məsələ deyil.Bir sözlə, hüquq fakültəsini bitirmiş əksər məzunların  prokuror, rəis olmaq arzuları ürəyində qalır.  Bizdə nədənsə, peşə dalınca getmək istəyənlər çox azdır. Amma  bərbər, dərzi , rəngsaz, maşın ustası olmaq istəyənlər bir o qədər də çox deyil.

Hansı ki, həmin peşələrin sahibi  lap yaxşı dolanır, ev, maşın alırlar. Mən bir neçə bərbər tanıyıram iki evi, iki maşını var, özü də bəy kimi dolanırlar. Bizim gənclər əsasən" prestij" arxasınca qaçır. Ona görə də hüquq fakültəsini bitirən  məzunların əksəriyyəti diplomu ola- ola  işsiz qalırlar. Məhz buna görə də gənclərimiz yaxşı- yaxşı düşünməlidir. Ki, onlara "prestij" lazımdır, yoxsa, iş yerləri?!

Emil Faiqoğlu