Müsəlman aləmində müqəddəs ay hesab olunan Ramazan ayı oruc ibadəti ilə müşayiət olunur.

Adalet.az diqqətə çatdırır ki, bu müddətdə gün doğandan gün batana qədər qida və sudan uzaq qalmaq orqanizmə müəyyən təsir göstərir. Mütəxəssislər bildirirlər ki, iftar və imsakda düzgün qidalanma həm sağlamlığı qorumaq, həm də gün ərzində halsızlığın qarşısını almaq baxımından mühüm əhəmiyyət daşıyır.

1. Xurma və su
İftarı xurma ilə açmaq həm ənənəvi, həm də sağlam seçimdir. Xurma qısa zamanda enerji verir, qan şəkərini balanslaşdırır. Su isə gün ərzində itirilən mayeni bərpa edir.

2. Şorba və yüngül yeməklər
Mərci, tərəvəz və ya toyuq şorbası mədəni yormadan həzm sistemini aktivləşdirir.

3. Zülallı qidalar
Yumurta, toyuq, balıq, qatıq uzun müddət toxluq hissi yaradır və əzələ itkisini önləyir.

4. Kompleks karbohidratlar
Kəpəkli çörək, yulaf, bulqur kimi qidalar enerjini tədricən verdiyi üçün gün ərzində aclıq hissini azaldır.

5. Meyvə və tərəvəzlər
Vitamin və mineral baxımından zəngindir, həm də qəbizliyin qarşısını alır.

Lakin bəzi qidalar vardır ki,  onları qəbul etmək həzm sistemini poza və aclıq hissi yarada bilər: 

1. Həddindən artıq yağlı və qızardılmış yeməklər - Mədə yanması, köp və həzmsizlik yarada bilər.

2. Şirniyyat və qazlı içkilər - Qan şəkərini sürətlə qaldırıb endirdiyi üçün halsızlıq və tez aclıq hissi yaradır.

3. Çox duzlu qidalar - İmsakda qəbul edildikdə gün ərzində susuzluğu artırır.

4. Həddindən artıq çay və qəhvə - Bədəni susuzlaşdıra bilər.

 İmsak üçün tövsiyə

Sahurda mütləq zülal, lif və kompleks karbohidrat balansı olmalıdır. Məsələn: yumurta, az duzlu pendir, tam taxıllı çörək, tərəvəz və bol su.

İftar üçün tövsiyə

Orucu su və xurma ilə açdıqdan sonra 10–15 dəqiqə fasilə verib yüngül yeməklə davam etmək daha sağlamdır. Birdən-birə həddindən artıq yemək mədə problemlərinə səbəb ola bilər.

Mütəxəssislər bildirirlər ki, xroniki xəstəliyi olan şəxslər oruc tutmazdan əvvəl mütləq həkimlə məsləhətləşməlidirlər. Ramazan ayı həm ruhun, həm də bədənin təmizlənməsi dövrü kimi dəyərləndirilir. Düzgün qidalanma isə bu müqəddəs ayı daha sağlam və rahat keçirməyə kömək edir.