"SEPAH donanmasının komandanı Əlireza Təngsiri bildirib ki, ABŞ-la bağlı neft təsisatları Amerika bazaları hesab olunacaq və həmin təsisatlara zərbə vuracaqlar". 

Adalet.az xəbər verir ki, bunu politoloq Elxan Şahinoğlu deyib. 

Politoloqun sözlərinə görə, o, sözügedən obyektlərdə çalışanları və digər mülki şəxsləri həmin ərazilərdən uzaqlaşmağa çağırıb: 

"Bununla SEPAH komandanı ölkəsinin rəsmilərinin “biz ancaq hərbi mərkəzlərə zərbə vururuq” və ya “biz neft və qaz mərkəzlərinə zərbə vurmamışıq” kimi tezislərinin üstündən xətt çəkdi. SEPAH “Körfəz ölkələrinin neft və qaz təsisatlarına zərbəni biz vurmuşuq və vurmaqda davam edəcəyik” yanaşmasıyla məsələyə nöqtə qoydu. Bu bir növü Türkiyənin xarici işlər naziri Hakan Fidanın İranın mühafizəkar hakimiyyəti barədə söylədiyi “mən batıramsa, bölgəni də özümlə batıraram” yanaşmasının təsdiqidir. İran hazırda neftini sata bilmir, bu səbəbdən maliyyə gəlirlərindən məhrum olan, o cümlədən ABŞ və İsrailin bombardmanları nəticəsində ağır itki verən SEPAH neft və qazın istismarından gəlir əldə edən ölkələri hədəf seçib. Yəni “mən neft və qaz sata bilmirəmsə, qonşularım da sata bilməsin”. Xəzərdəki neft və qaz yataqlarımızın əsas operatoru Böyük Britaniyanın bp şirkətidir. Bu şirkətin ABŞ-da da böyük yatırımları mövcuddur. Başlarını itirən SEPAH generalları yenə yanlış hədəf seçərlərsə, bu onlara baha başa gələcək". 

Vasif ƏLİHÜSEYN