Ermənistanın anti-Rusiya fəaliyyəti davam edir və Ermənistan BMT Baş Assambleyasının Rusiyaya qarşı ittihamları ehtiva edən qətnaməsinin lehinə səs verib.

Adalet.az xəbər verir ki, məlumatı erməni mediası olan 168.am saytı yayıb:“Birləşmiş Millətlər Təşkilatı ilə regional və digər təşkilatlar arasında əməkdaşlıq: Birləşmiş Millətlər Təşkilatı ilə Avropa Şurası arasında əməkdaşlıq” adlı sənəd lehinə 105, əleyhinə 9 ölkə, 33 ölkə bitərəf olmaqla qəbul edilib.

Azərbaycan və İsrail səsvermədə iştirak etməyib. ABŞ isə əleyhinə səs verib.

Qətnamənin preambulasında xüsusilə “Rusiyanın Ukrayna və Gürcüstana təcavüzündən” bəhs edilir.

ABŞ-ın Birləşmiş Millətlər Təşkilatındakı səfiri Conatan Şrayer ABŞ-ın Avropa Şurasının insan hüquqlarının müdafiəsi və inkişaf etdirilməsi, demokratiyanın inkişafı və qanunun aliliyinin yüksəldilməsi istiqamətində fəaliyyətini yüksək qiymətləndirdiyini, lakin qətnamənin ABŞ-ın iki ölkə arasında sülhün əldə edilməsinə çalışdığı bir vaxtda faydasız olduğunu bildirib".

Qeyd edək ki, hələ 2023-cü ildə Ermənistan parlamenti Beynəlxalq Cinayət Məhkəməsinin Roma statutunu ratifikasiya etməklə Rusiya ilə mövcud çatı dərinləşdirmişdi. Beləki, Ermənistan parlamentinin 107 deputatından 60-ı qanun layihəsinin lehinə, 36 müxalif deputatdan 22-si isə əleyhinə səs vermişdi.

 Əntiqə Rəşid