Ermənistanın Baş naziri Nikol Paşinyanla ABŞ Prezidenti Donald Tramp arasında telefon danışığı baş tutub.

Adalet.az Ermənistan mediasına istinadən xəbər verir ki, söhbət zamanı Ermənistan-Azərbaycan sülh prosesi və Vaşinqtonda əldə olunan razılaşmalar ətrafında fikir mübadiləsi aparılıb.

Nikol Paşinyan Ermənistan və Azərbaycan arasında sülh prosesinə göstərdiyi dəstəyə, xüsusilə 2025-ci il avqustun 8-də Vaşinqtonda keçirilən Sülh Sammitinin təşkilinə görə Donald Trampa təşəkkür edib. Ermənistanın Baş naziri, həmçinin Trampın Ermənistan və Azərbaycan liderləri tərəfindən qəbul edilən Sülh Bəyannaməsini şahid qismində imzalamasını yüksək qiymətləndirib.

Paşinyan iki ölkə arasında sülhün əldə olunmasında Donald Trampın şəxsi səylərinin həlledici əhəmiyyət daşıdığını vurğulayıb.

Tərəflər Vaşinqton razılaşmalarının Ermənistan və Azərbaycan arasında xalqların gündəlik həyatında hiss ediləcək real sülhün təmin olunmasına töhfə verdiyini bildiriblər.

Telefon danışığı zamanı “TRIPP” layihəsinin icrası ilə bağlı cari vəziyyət də müzakirə olunub. Paşinyan və Tramp yaxın gələcəkdə layihə çərçivəsində infrastrukturun tikintisinə başlanılması istiqamətində fəaliyyət göstərmək əzmində olduqlarını təsdiqləyiblər.

Söhbət zamanı Ermənistan-ABŞ ikitərəfli münasibətləri, eləcə də beynəlxalq gündəmin digər aktual məsələləri barədə fikir mübadiləsi aparılıb.