Xarici işlər naziri Ceyhun Bayramov BMT Baş Assambleyasının 81-ci sessiyası (UNGA81) çərçivəsində İqtisadi Əməkdaşlıq Təşkilatının (İƏT) Nazirlər Şurasının iclasında çıxış edib.

Adalet.az xəbər verir ki, bu barədə Azərbaycan Xarici İşlər Nazirliyinin rəsmi “X” hesabında məlumat verilib.

Çıxışında nazir Ceyhun Bayramov Xankəndidə keçirilmiş İƏT-in 17-ci Sammitində qəbul edilən strateji Xankəndi Bəyannaməsi və Fəaliyyət Planının icrası prosesini təqdim edib. O, Bakıda İƏT Təmiz Enerji Mərkəzinin fəaliyyətə başlamasını və Şuşanın 2026-cı il üçün “İƏT Turizm Paytaxtı” kimi fəal rolunu xüsusi vurğulayıb.

XİN rəhbəri Bakı–Tbilisi–Qars dəmir yolu, Ələt Limanı, eləcə də “Rəqəmsal İpək Yolu” vasitəsilə yaşıl rəqəmsal inteqrasiya da daxil olmaqla, Azərbaycanın Orta Dəhliz boyunca oynadığı mühüm rolu diqqətə çatdırıb.

C. Bayramov Cənubi Qafqaz ilə Mərkəzi Asiya arasındakı strateji sinerjiyə toxunaraq, Azərbaycanın Çolpon-Ata şəhərində keçirilən Mərkəzi Asiya Dövlət Başçılarının Məşvərət Görüşündəki fəal iştirakını və Avazada keçiriləcək növbəti sammitə hazırlığını qeyd edib.

Nazir, həmçinin 2025-ci ilin avqust ayında baş tutan Vaşinqton Sülh Sammitindən sonra Azərbaycan və Ermənistan arasında davam edən sülh prosesi, etimadın möhkəmləndirilməsi addımları, tranzit məhdudiyyətlərinin aradan qaldırılması, eləcə də işğaldan azad edilmiş Qarabağ və Şərqi Zəngəzurda həyata keçirilən genişmiqyaslı yenidənqurma işləri barədə iclas iştirakçılarını ətraflı məlumatlandırıb.