Argentina millisinin futbolçusu Lionel Messi və İspaniya yığmasının sabiq üzvü Serxio Buskets karyeraları ərzində birlikdə keçirdikləri oyun sayını 653-ə yüksəldərək dünya rekordunu yeniləyiblər.

Adalet.az Beynəlxalq Futbol Tarixi və Statistikaları Federasiyasının (IFFHS) rəsmi saytına istinadla xəbər verir ki, bu görüşlərin 569-u İspaniyanın “Barselona”, 84-ü isə ABŞ-nin “İnter Miami” klublarının heyətində baş tutub. Rekord göstərici ispaniyalı yarımmüdafiəçinin son MLS mövsümündən sonra karyerasını başa vurması ilə yekunlaşıb.

Serxio Buskets daha əvvəl Jerar Pike ilə bu göstəricidə rekord müəyyənləşdirib. Onlar birlikdə 620 qarşılaşmada (533-ü “Barselona”, 87-si İspaniya millisi) meydana çıxıblar.

Qeyd edək ki, futbol tarixində yalnız dörd oyunçu cütlüyü 600-dən çox matçda birlikdə iştirak edib. Ötən il Manuel Noyer və Tomas Müller tandemi də bu həddi keçərək 611 oyuna çatıb. Onlar Almaniyanın “Bavariya” komandasının formasında eyni meydanı bölüşüblər.