Olmadı

Bu ağac da bar vermədi,

Bu bağ da bir bağ olmadı.

Sevincimə yiyə duran,

Dərdimə ortaq olmadı .

Kef damağı çağ olanlar,

Üzümüzə ağ olanlar

Ürəyimdə dağ olanlar

Kürəyimdə dağ olmadı.

Azadam,xoşbəxtəm- deyə

Səs saldım bütün ölkəyə,

Sevincdən hoppandım göyə,

Düşəndə torpaq olmadı.

Bir damla yaşa da dəyməz

Çırpın köksüm altda körpə quş kimi,

Çağlama, çağlama,çağlama könlüm.

Yenə altdan-altdan odlu sinəmi,

Dağlama, dağlama,dağlama könlüm.

Haqdan sınmayanlar nahaqdan sınar,

Ağac kökdən deyil,budaqdan sınar.

Dost var,bir balaca sınaqdan sınar,

Yoxlama,yoxlama,yoxlama könlüm.

Sözləri inci tək düz varaqlara,

Yapışsın köz kimi söz varaqlara.

Yazmalı nə varsa yaz varaqlara,

Saxlama,saxlama,saxlama könlüm.

Bir əyri qaşa da dəyməz bu dünya,

Atdığın daşa da dəyməz bu dünya.

Bir damla yaşa da dəyməz bu dünya,

Ağlama,ağlama,ağlama könlüm.

1997

Nə qorxusu

Kəfən rəngli saçlarımdan,

Gəlsə də ölüm qoxusu.

Sızlama gözüm işığı,

Ağlama ,könlüm yavrusu.

Dərdlərin dəli hücumu,

Ağlar qoydu sevincimi.

Ömür adlanan köçümün

Keçmişdə qaldı çoxusu.

Dərdə könül verənlərin ,

Qəm hörgüsü hörənlərin.

Bu dünyanı görənlərin,

O dünyadan nə qorxusu?!

1996

Ağlaya-ağlaya

Bu dünya nə olan şeydi

Bildik ağlaya-ağlaya.

Açdıq ağlaya-ağlaya,

Solduq ağlaya-ağlaya.

Bir tamsa da,kəsirsə də,

Baş açmadıq,nə sirsə də.

Beşiksə də,qəbirsə də,

Gəldik ağlaya-ağlaya.

Qana-qana,bilə-bilə,

Yana-yana döndük külə.

Yaşamadıq gülə-gülə,

Güldük ağlaya-ağlaya.

2005