Qışın sərtləşməsi və beynəlxalq humanitar yardımın kəskin azalması Əfqanıstanda aclıq böhranını daha da ağırlaşdırıb.

Adalet.az xəbər verir ki, "Reuters" agentliyinin məlumatına görə, paytaxt Kabulun kənarında qurulmuş çadırlarda yaşayan ailələr gün ərzində yalnız qurudulmuş çörək və çayla kifayətlənməyə məcbur qalırlar. İrandan və Pakistandan deportasiya edilən milyonlarla əfqan ailəsi müharibədən çıxmış ölkəyə qayıtdıqdan sonra ciddi sosial-iqtisadi çətinliklərlə üzləşib.

55 yaşlı Samiullah bildirib ki, ailəsi artıq ölümlə barışacaq həddə çatıb. Onun sözlərinə görə, qayıdışdan sonra bütün yığımları itirilib və qış aylarını keçirmək üçün imkanları qalmayıb.

BMT-nin Ümumdünya Ərzaq Proqramının (WFP) hesablamalarına əsasən, hazırda Əfqanıstanda 17 milyon insan kəskin aclıqla üz-üzədir.

WFP-nin ölkə üzrə direktoru Con Ayliff qeyd edib ki, qış mövsümündə iş imkanlarının azalması və geri qayıdan əfqanların sayının artması vəziyyəti daha da çətinləşdirib. Onun sözlərinə görə, İrandan və Pakistandan göndərilən pul köçürmələri əvvəllər bir çox ailələr üçün əsas dolanışıq mənbəyi idi, lakin deportasiyalar bu axını kəsib. Nəticədə daha 3 milyon insan aclıq riski ilə qarşı-qarşıya qalıb.

Agentlik yazır ki, ABŞ-də Donald Trampın yenidən prezident postuna qayıtmasından sonra qlobal humanitar proqramlara ayrılan vəsaitlərin azaldılması WFP kimi təşkilatların imkanlarını xeyli zəiflədib. Digər donor ölkələrin də maliyyəni ixtisar etməsi milyonlarla insanı risk altında qoyur.

WFP-nin məlumatına görə, ötən il Əfqanıstanda tarixdə qeydə alınan ən böyük qidalanma böhranı yaşanıb və 2026-cı ildə daha 200 min uşağın kəskin qida çatışmazlığı ilə üzləşəcəyi proqnozlaşdırılır.

Qeyd edilir ki, klinikalarda uşaqların sayı artıb, lakin tibbi əlavələr və ərzaq yardımı ailələrin uzunmüddətli ehtiyaclarını ödəmək üçün kifayət etmir. Bir çox ailələr əvvəl aldıqları yardım kəsildikdən sonra yenidən yoxsulluğa sürüklənib.

"Reuters" xatırladır ki, 2021-ci ildə beynəlxalq qüvvələrin çıxarılmasından və Talibanın hakimiyyətə qayıdışından sonra Əfqanıstan dərin iqtisadi və humanitar böhran içindədir. Qışın gəlişi ilə minlərlə ailə üçün vəziyyət daha da dözülməz hal alıb./Teleqraf