Alimlərin apardığı yeni araşdırma Yer üzündə bitki həyatının nə vaxta qədər davam edə biləcəyini müəyyənləşdirib. Üçölçülü iqlim modellərinə əsaslanan hesablamalara görə, planetimizdəki son bitki növləri təxminən 1,87 milyard il sonra yox olacaq.

Adalet.az xəbər verir ki, tədqiqatın nəticələri “Journal of Geophysical Research: Atmospheres” jurnalında dərc olunub.

Astrobioloq Ceykob Haqq-Misra və iqlimşünas Erik Volf növbəti iki milyard il ərzində Yerin iqlimində baş verəcək dəyişiklikləri modelləşdiriblər.

Alimlərin proqnozuna görə, bu müddətdə Günəş təxminən 20 faiz daha parlaq olacaq. Nəticədə ya həddindən artıq istilik bitki örtüyünü məhv edəcək, ya da atmosferdə karbon qazının azalması bitkilərin yaşamasını mümkünsüz edəcək.

Tədqiqatda vurğulanır ki, Yerin ümumi biokütləsinin təxminən 80 faizini təşkil edən bitkilərin taleyi atmosferdəki karbon qazının səviyyəsi və qlobal temperaturun dəyişməsindən asılı olacaq.

Araşdırma çərçivəsində iki fərqli ssenari nəzərdən keçirilib. Birinci ssenaridə karbonun udulması güclü olur, temperatur nisbətən sabit qalsa da, atmosferdə karbon qazı sürətlə azalır. Bu halda bitkilər karbon çatışmazlığı səbəbindən təxminən 1,84 milyard il sonra məhv olur.

İkinci ssenaridə isə karbon qazı səviyyəsi sabit qalır, lakin qlobal orta temperatur 65 dərəcə Selsiyə yüksəlir. Bu şəraitdə qurudakı son bitkilərin təxminən 1,87 milyard il sonra yox olacağı hesablanıb. Alimlərin sözlərinə görə, bu müddət Yer okeanlarının buxarlanaraq tamamilə yox olması üçün tələb olunan vaxtla, demək olar ki, üst-üstə düşür.

Tədqiqat müəllifləri qeyd edirlər ki, bu hesablamalar müasir bitki növlərinin indiki xüsusiyyətlərini qoruyacağı fərziyyəsinə əsaslanır. Onların fikrincə, gələcəkdə bitkilərin təkamül yolu ilə dəyişməsi və ya inkişaf etmiş texnologiyaların tətbiqi bu müddəti uzada bilər.

Ehtimal edilir ki, gələcəkdə bitkilər dəyişən iqlim şəraitinə uyğunlaşaraq daha yüksək hündürlüklərdə yaşaya və ya insanlığın Günəş radiasiyasını azaltmağa yönəlmiş texnologiyaları Yer kürəsinin daha uzun müddət yaşanılan qalmasına kömək edə bilər.