Böyük Britaniyalı cərrah Karan Rangarajan gün ərzində daim nəsə yemək vərdişinin qarın ağrısı və diskomforta səbəb ola biləcəyini bildirib.

Adalet.az xəbər verir ki, bu barədə "Daily Mirror" nəşri məlumat yayıb.

Həkimin sözlərinə görə, insanın həzm sistemində “miqrasiyaedici motor kompleks” (MMK) adlandırılan bir mexanizm fəaliyyət göstərir. Bu kompleks yeməklər arasında mədə və nazik bağırsağın ritmik yığılma hərəkətlərindən ibarətdir.

MMK-nın əsas funksiyası - orqanizmdə qida qalığı və bakteriyaların yığılmasının qarşısını almaqdır. Bu mexanizm “daxili təmizlikçi” kimi fəaliyyət göstərir və bağırsaq florasının pozulmamasına, eləcə də şişkinlik və iltihabi proseslərin qarşısının alınmasına kömək edir.

Lakin daim qəlyanaltı etməklə bu təbii sistemin işi pozulur. Həzm sistemi fasiləsiz olaraq qidanı emal etməyə çalışdıqda, bu, həzmin zəifləməsinə, qalıqların toplanmasına və nəticədə bağırsaqlarda bakterial fermentasiyanın yaranmasına səbəb ola bilər.