Çinin şimalındakı Tiencin bələdiyyəsindən Azərbaycanın paytaxtı Bakıya Xəzər dənizi üzərindən ilk Çin-Orta Asiya yük qatarı yola salınıb.

Adalet.az xəbər verir ki, qatar paslanmayan polad borular və məişət texnikası da daxil olmaqla, müxtəlif mallar daşıyır.

“China Railway Beijing Group” tərəfindən idarə olunan qatar Çinin şimal-qərbində yerləşən Sincan Uyğur Muxtar Bölgəsindəki Horqos sərhəd-keçid məntəqəsindən ölkəni tərk edərək, Qazaxıstan ərazisindən keçəcək, daha sonra isə Xəzər dənizi üzərindən Bakıya çatdırılacaq.

Tiencin Konteyner Mərkəzi Stansiyasının nümayəndəsi Yanq Cunyonqun sözlərinə görə, yeni marşrut Tiencini Azərbaycan, Qazaxıstan və digər ölkələrlə birləşdirən sabit və səmərəli yükdaşıma kanalı yaradacaq.

O bildirib ki, təxminən 7 min kilometr məsafəni 20 günə qət edən bu marşrut ənənəvi dəniz nəqliyyatı ilə müqayisədə daşınma müddətini təqribən 10 gün azaldır.

Vurğulanıb ki, Azərbaycanın paytaxtı Bakı Xəzər dənizi üzərindən keçən beynəlxalq multimodal nəqliyyat dəhlizində mühüm mərkəz rolunu oynayır. Tiencindən gətirilən yüklər Bakıya çatdıqdan sonra digər ölkə və regionlara da paylana bilər.

Qeyd edək ki, 2025-ci ildə Tiencin Konteyner Mərkəzi Stansiyası ümumilikdə 390 Çin-Avropa (Mərkəzi Asiya) yük qatarına xidmət göstərib ki, bu da əvvəlki illə müqayisədə 38 faiz artım deməkdir.