“Dünya sürətlə dəyişir, zamanın çarxı artıq başqa bir ahənglə fırlanır. İnsanlığın minilliklər boyu torpaqla, suyla, alovla apardığı mübarizə indi intellektin, rəqəmlərin və süni zəkanın sonsuz üfüqlərinə köçüb. Bu böyük dəyişiklik fırtınasında bəzi millətlər sadəcə seyrçi qalır, bəziləri isə tarixin bu yeni axınına yön verir. Fevralın ortasında Bakıda keçirilən o tarixi müşavirədə biz bir daha şahid olduq ki, Azərbaycanın sükanı arxasında zamanı qabaqlayan, gələcəyi bir kitab kimi oxuyan və xalqını o gələcəyin ən uca zirvəsinə hazırlayan bir Lider dayanır. Cənab Prezident İlham Əliyevin "Rəqəmsal Arxitektura" haqqındakı çıxışı sadəcə bir fəaliyyət planı deyil, bu, qüdrətli Azərbaycanın rəqəmsal dünyadakı istiqlal bəyannaməsidir”.

Bu fikirləri aia.az saytının baş redaktoru Azər Məmmədov Prezident İlham Əliyevin sədrliyi ilə “Azərbaycanın yeni rəqəmsal arxitekturası” adlı vahid fəaliyyət planına həsr olunmuş müşavirəni şərh edərkən səsləndirib.

Media təmsilçisi qeyd edib ki, cənab Prezidentin hər bir kəlməsində dövlət başçısının uzaqgörənliyinin və vətəndaş yanğısının şahidi oluruq. “"Biz coğrafi vəziyyətimizi ölkəmizin inkişafına bağlamışıq" deyən Lider, əslində bir millətin taleyini dəyişən o böyük düsturu açıqlayır. Asiya ilə Avropa arasındakı o qədim körpü indi polad relslərdən və neft kəmərlərindən daha sürətli, daha güclü bir vasitəyə — nur sürəti ilə hərəkət edən fiber-optik dəhlizlərə çevrilir. Xəzərin dibi ilə uzanan o kabellər əslində Azərbaycanın gələcəyə uzanan işıqlı telləridir. Biz artıq təkcə enerji ixrac etmirik, biz dünyaya biliyin, məlumatın və texnologiyanın yolunu açırıq.”

Azər Məmmədov şərhində qeyd edir ki, cənab Prezidentin bu çıxışında ən təsirli məqam onun dünyaya verdiyi o sarsılmaz "Etibar" mesajıdır. “20 ildə qoyulan 350 milyard dollarlıq sərmayə sadəcə rəqəm deyil, İlham Əliyev şəxsiyyətinə olan qlobal inamın ifadəsidir. 30 il əvvəl imzalanan müqavilənin bir nöqtəsinin belə dəyişməməsi bir dövlətin namusudur. İndi bu namus və etibar rəqəmsal dünyanın nəhəngləri ilə qurulan münasibətlərin təməlində dayanır. Amerika fondlarından tutmuş Çin sənayesinə qədər hər kəs bilir ki, Azərbaycan Liderinin sözü imzadan daha kəsərlidir. Bu gün rəqəmsallaşma bizim üçün sadəcə texnoloji yenilik deyil, həm də milli suverenliyimizin rəqəmsal qalasını qurmaqdır.”

Hər şeydən uca olan İnsandır deyən baş redaktor cənab Prezidentin "mygov" platformasını vahid mərkəz kimi elan etməsini, bürokratiyanın divarlarını yıxıb vətəndaşın işini asanlaşdırmaqla onun xalqına olan sonsuz sevgisinin təzahürü olduğunu qeyd edir: “O, istəyir ki, Azərbaycan övladı dünyanın hər yerində öz biliyi ilə fəxr etsin, süni intellekt onun gündəlik köməkçisinə çevrilsin. Məktəbdəki şagirddən tutmuş nazirlikdəki məmura qədər hər kəs bu yeni arxitekturanın bir parçası olmalıdır. Çünki bu arxitektura sadəcə binalardan və serverlərdən deyil, azərbaycanlı zəkasından və vətənpərvərliyindən ucaldılır.”

Azər Məmmədov şərhini yekunlaşdırarkən bir həqiqətin tam çılpaqlığı ilə ortada olduğunu qeyd edib: “Cənab İlham Əliyevin müəyyən etdiyi bu yol Azərbaycanı rəqəmsal dünyanın paytaxtına çevirəcək bir yoldur. Bu, sadəcə texnologiya davası deyil, bu, Azərbaycanın əbədi varlıq davasıdır. Və bu davada bizim ən böyük silahımız Liderimizin sarsılmaz iradəsi və gələcəyə olan o sönməz inamıdır. Zəfərimiz mübarək, yolumuz aydın olsun!”