“İlk növbədə ev şəraiti yaxşı olmayanlar, yataqxanalarda yaşayanlar Ağdama köçürüləcək”.

Adalet.az xəbər verir ki, bu sözləri millət vəkili Aqil Abbas Ağdamın bərpası və ora gözlənilən köçlə bağlı Bakıvaxtı.az-a danışarkən deyib.

Onun sözlərinə görə, çox güman ki, sonra şəhərdə, müxtəlif yerlərdə, qəsəbələrdə yaşayanlar köçürüləcək.

Aqil Abbas Ağdama köç başlayanda doğma yurda dönəcəyini vurğulayıb:

“Xanımımla razılaşmışıq. Biz də gedib Ağdamda yaşayacağıq. İnşallah ki, belə də olacaq”.

Qeyd edək ki, Prezident İlham Əliyev fevralın 26-da Xocalı rayon ictimaiyyətinin nümayəndələri ilə görüşündə Ağdama ilk köçün gələn il başlanacağını bildirib.

Dövlətimizin başçısı qeyd edib ki, artıq beş yaşayış məntəqəsinə keçmiş köçkünlər qayıdıblar. Bu il o yaşayış məntəqələrinin sayı 20-yə çatacaq.

Bu il həm Xocalıda, həm də Xankəndidə həyatın bərpa olunacağını qeyd edən dövlət başçısı deyib: “Malıbəyli, Kərkicahan, Şuşanın Turşsu kəndləri də bərpa ediləcək. Ağdam şəhəri bərpa olunur və gələn il Ağdama da ilk köç başlanacaq. Yəni, quruculuq işləri geniş vüsət alır”.