""Qarabağ"la görüşdə maksimum səviyyədə mübarizə apardıq. Ümid edirəm ki, buna növbəti matçlarda da nail olacağıq. Nəticə hər zaman istədiyimiz kimi olmur. Amma vacib olan inanmaqdır".

Adalet.az xəbər verir ki, bunu İtaliyanın “Napoli” klubunun futbolçusu Amir Rahmani UEFA Çempionlar Liqasının əsas mərhələsində “Qarabağ”a 2:0 hesabı ilə qalib gəldikləri matçla bağlı danışarkən deyib.

O, qarşılaşmanın asan keçmədiyini vurğulayıb: “Bu, son üç həftədə yeddinci oyunumdur. Zədədən sonra bu qədər sıx qrafikdə oynamaq çətindir. Bəlkə də topla oyunda imkanlarımız artıb. Amma hər şey topu necə hərəkət etdirməyimizdən, meydandakı davranışımızdan və futbolçuların şəxsi keyfiyyətlərindən asılıdır”.

“Biz həmişə daha yüksək məqsədlər uğrunda mübarizə aparırıq və ən yaxşı nəticələrə can atırıq. Ümid edirəm ki, “Qarabağ”la oyundakı qələbə növbəti matçlar üçün inamımızı daha da artırar”, - deyə Rahmani bildirib.