Türkiyə Prezidenti Rəcəb Tayyib Ərdoğan İsrailin Qəzzada apardığı hərbi əməliyyatları kəskin tənqid edib. 

Adalet.az xəbər verir ki, o, sosial şəbəkə “X”dəki paylaşımında İsrail Baş naziri Benyamin Netanyahunu və onun ətrafını “zalımlar şəbəkəsi” adlandıraraq onları qəddarlıqda Almaniya diktatoru Adolf Hitləri belə geridə qoymaqda ittiham edib.

“Netanyahu və onun zalım şəbəkəsi qəddarlıqda çoxdan Hitleri geridə qoyub. Avropada Holokost zamanı belə Qəzzadakı kimi qeyri-insani mənzərələr yaşanmamışdı”, – deyə Ərdoğan bildirib.

Türkiyə Prezidenti Qəzzada baş verənləri “insanlıq fəlakəti” adlandırıb və beynəlxalq ictimaiyyəti bu vəhşiliyə qarşı birləşməyə çağırıb.

“Onlarla günahsız insan hər gün aclıq və susuzluqdan həyatını itirir. Körpələr, uşaqlar, qocalar un kisəsi tapmaq üçün can verir. Kəsilmiş körpə başları, qolları, ayaqları, basdırılmamış cəsədlər və anaların fəryadları artıq insanlığa sığmır”, – deyə o, emosional çıxışında qeyd edib.

Ərdoğan bildirib ki, Qəzzada baş verənlərə səssiz qalan hər bir şəxs bu cinayətlərə şərik sayılır:

“İnsanlıq Qəzzada məhv olur, biz buna göz yuma bilmərik. Bu diktəyə, bu zülmə birlikdə “yetər artıq” deməyin zamanıdır. Bir ovuc hakimiyyət hərisi bəşəriyyəti rəzil edir – buna imkan verməməliyik”.

Ərdoğan paylaşımını beynəlxalq ictimaiyyətə çağırışla yekunlaşdırıb:

“Bu qaranlıq dövrdə insanlığın yanında dayanmaq hər birimizin borcudur”.