adalet.az header logo
  • Bakı 12°C
  • USD 1.7
27 Fevral 2024 19:43
475
DÜNYA

"Ən böyük təhlükə, əvvəlki kimi, Əfqanıstan ərazisindən gəlir” - Şoyqu

Rusiyanın müdafiə naziri Sergey Şoyqu Rusiya Federasiyası Müdafiə Nazirliyinin kollegiya iclasında beş ölkənin hərbi qüvvələrinin iştirak edəcəyi KTMT-nin “Qarşılıqlı fəaliyyət-2024” hərbi təliminin keçirilməsi barədə məlumat verib. 

Adalet.az xəbər verir ki, Şoyqunun sözlərinə görə, təlim Mərkəzi Hərbi Dairə qoşunlarının illik təliminin kulminasiya nöqtəsi olacaq və radikal qrupların artan təhlükəsi və Mərkəzi Asiyada qərbyönlü QHT-lərin sabitliyi pozan təsiri fonunda əməliyyatların əlaqələndirilməsinə yönəlib.

Şoyqu vurğulayıb ki, region ciddi problemlərlə üz-üzədir, o cümlədən İslam Dövləti yaraqlılarının sayının 15 faiz artması və Mərkəzi Asiya respublikalarında narkotik istehsalının təxminən 20 faiz artması.

Nazir Rusiyanın Ukraynada xüsusi hərbi əməliyyatı fonunda Mərkəzi Asiya ölkələrində anti-Rusiya ritorikasını gücləndirən qərbyönlü qeyri-hökumət təşkilatlarının roluna xüsusi diqqət yetirib. Nazir hesab edir ki, onların fəaliyyəti region dövlətlərinin Rusiya ilə hərbi-texniki, iqtisadi və mədəni əməkdaşlığına xələl gətirir. Rusiya bu təhdidlərə cavab olaraq öz maraqlarını qorumaq və KTMT-nin cənub sərhədlərində təhlükəsizliyi gücləndirmək üçün qabaqlayıcı tədbirlər görür.

“Regionda vəziyyət ağır olaraq qalır. Ən böyük təhlükə, əvvəlki kimi, Əfqanıstan ərazisindən gəlir”, - Şoyqu Rusiya Müdafiə Nazirliyi kollegiyasının iclasında bildirib.
O əlavə edib ki, Mərkəzi Hərbi Dairənin 2024-cü ildə əsas səyləri region ölkələrində böhranlı vəziyyətlərin həllinə və Qazaxıstan, Qırğızıstan və Tacikistan ərazilərində planlaşdırılan 7 hərbi təlimdə iştiraka yönəldiləcək.

KTMT-nin “Qarşılıqlı fəaliyyət-2024” təlimi regionda müasir təhlükəsizlik təhdidlərinə qarşı mübarizəyə yönəlmiş iştirakçı dövlətlərin hərbi kontingentləri arasında əməliyyatların əlaqələndirilməsi və təcrübə mübadiləsində mühüm mərhələyə çevriləcək.