Heç bir qaşqabaqlı fikir, ağsaqqal öyüd dilimizi qoruya bilməyəcək.

“Hər dəfə ölkədə dilimizi qoruyaq yarışı başlayanda dilimiz bir az da İnflyasiyaya uğrayır. Dil və İnflyasiya! Bu hardan çıxdı dediyinizi eşitdim. İqtisadiyyatda inflyasiya anlayışı keyfiyətin artmaması fonunda qiymətlərin artmasıdır. Bu zaman pul dəyər itirir və yığına çevrilir. Üç manata aldığın şeyi üç yüz min manata alırsan”. 

Adalet.az xəbər verir ki, bunu yazıçı Aqşin Yenisey deyib. 

O, bildirib ki, biz də hər dəfə dilimizi qoruyaq yarışına girəndə dilimizdə heç bir keyfiyyət dəyişikliyi baş vermir, sadəcə, danışanların sayı artır və nəhayət, dilimiz daha çox söz yığınına çevrilir:

“Üç kəlmə ilə deməli olduğumuz mətləbi yarışı udmaq üçün üç yüz kəlmə ilə deyirik. O vaxt Derrida da öz ölkəsində deyirdi ki, dil haqqında danışmağın dəbə minməsi, avamlığı gizlətmək üçün əla fürsətə çevrilib. Dili belə qorumurlar. Dili qoruyan o dildə yazılan, oxunan, müzakirə olunan mövzu və anlayışların dərinliyidir. Yəni keyfiyyətin yüksəldilməsidir. 

İndi biz nə edəcəyik sizə deyim. İki cüt, bir tək xalq yazıçısı filan çıxıb deyəcək ki, market yox, dükan deyək, yaxud Xoşqədəm "tələffüz" sözündə f hərfinin birini düzgün tələffüz etmir. İki məmurun "arpasını" bölməkdən başqa işi-gücü olmayan mediamız da bunu tirajlayacaq. Vəssalam! Bu da olacaq dilimizi qorumaq! Qardaşlar, son otuz ilin 100 kitab siyahısı var əlimizdə. O kitablar dilimizə tərcümə olunmasa, heç bir qaşqabaqlı fikir, ağsaqqal öyüd dilimizi qoruya bilməyəcək. Bu dil məişət səviyyəsindən çıxıb dövlət dili ola bilməyəcək”.

Vasif ƏLİHÜSEYN