11 Dekabr 2023 12:04
410
DÜNYA

Britaniya və Norveç Ukraynanı gücləndirmək üçün yeni koalisiya yaradır

Böyük Britaniya və Norveç yeni dəniz koalisiyası yaradacaq.

Koalisiyanın yaradılmasında məqsəd Ukraynanın dənizdəki hərbi imkanlarının gücləndirilməsi olacaq.

Bu barədə Britaniya Müdafiə Nazirliyindən məlumat verilib.

“Böyük Britaniya Norveçlə birlikdə dənizdəki imkanların gücləndirilməsi üzrə yeni koalisiyaya rəhbərlik edəcək ki, bu koalisiya Ukraynanın dənizdə hərəkət qabiliyyətinin gücləndirilməsi üçün gəmilər və nəqliyyat vasitələrinin təchizatını təmin edəcək”, - deyə bəyanatda bildirilib.

Nazirlikdən, həmçinin əlavə edilib ki, yeni koalisiya Ukraynaya uzunmüddətli dəstək, o cümlədən hərbçilərin təlimi, Qara dənizdə təhlükəsizliyin gücləndirilməsi üçün avadanlıq və infrastrukturla təminat məsələlərini həyata keçirəcək.

Britaniya Müdafiə Nazirliyindən qeyd edilib ki, uzunmüddətli perspektivdə koalisiyada iştirak edən ölkələrin dəstəyi Ukraynaya öz hərbi donanmasını transformasiya etməyə, onu NATO standartlarına uyğunlaşdırmağa kömək edəcək. Bundan əlavə, dəstək tədbirləri bütövlükdə Qara dənizdə təhlükəsizliyin gücləndirilməsini təmin edəcək.

Qeyd edək ki, Böyük Britaniya və Norveç artıq Ukrayna hərbçilərinə təlimlər keçir. 2023-cü ildə Norveç hakimiyyəti 3,2 min ukraynalı hərbçi üçün ölkədə və xaricdə təlim keçirməyi planlaşdırıb. Böyük Britaniyada əsasən ukraynalı pilotlara və texniki heyətə F-16 qırıcılarını idarə etmək üçün təlimlər keçirilir.