Bakı Xoreoqrafiya Akademiyasının (BXA) tam orta təhsil və orta ixtisas təhsili pillələrinin təşkilatçılığı ilə baharın gəlişini xəbər verən sonuncu ilaxır—Torpaq çərşənbəsinə həsr olunmuş konsert proqramı təşkil olunub.

Tədbirdə BXA-nın rəhbərliyi, müəllimləri, tələbə-şagird heyəti, incəsənət və media nümayəndələri ilə yanaşı qonaqlar da iştirak edib.

Bayram konsertində orta ixtisas təhsili pilləsinin tələbələrinin ifasında “Şuşanın dağları”, “Qaval rəqsi”, “Məhsul rəqsi”, “Yallı”, “Tarla qızları” və BXA-nın müəllimi Yelena Çernousovanın təqdimatında “İlk bahar” rəqs kompozisiyaları nümayiş olunub.

Konsert proqramı çərçivəsində Novruz bayramının əsas personajları olan Kosa və Keçəlin məzhəkəsi şənliyə xüsusi rəng qatıb.

Konsertdən sonra BXA-nın tam orta təhsil pilləsinin şagirdlərinin və orta ixtisas təhsili pilləsinin tələbələrinin təqdimatında müxtəlif növ bayram şirniyyatlarından ibarət xeyriyyə yarmarkası təşkil olunub.