18 may tarixində Azərbaycan Respublikası Mədəniyyət Nazirliyi Nizami Gəncəvi adına Milli Azərbaycan Ədəbiyyatı Muzeyinin Xaqani Şirvani adına Aran Regional filialında ənənəvi olaraq “Ədəbiyyatımız milli-mənəvi dəyərimizdir” devizi altında növbəti "Açıq qapı" keçirilmişdir. 

İnsanların asudə vaxtının səmərəli təşkili, onların Azərbaycanın zəngin mədəni irsi ilə yaxından tanış olmalarının təmin edilməsi məqsədilə hər il olduğu kimi, bu il də keçirilən “Açıq qapı” tədbiri rayon ictimaiyyəti tərəfindən böyük maraqla qarşılanıb. Gün ərzində rayonun idarə və təşkilatlarından, mədəni-maarif müəssisələrindən, təhsil ocaqlarından və ədəbiyyatsevərlərdən ibarət çoxsaylı ziyarətçilər muzeyə baş çəkmişlər.

Ziyarətçilər muzeydə nümayiş etdirilən ekspozisiyalarla yaxından tanış olmuş, muzeyin əməkdaşları tərəfindən qonaqlara klassik və müasir Azərbaycan ədəbiyyatının görkəmli nümayəndələri, onların həyat və yaradıcılığı haqqında  geniş və dolğun məlumatlar verilmişdir. Ekskursiyalar zamanı ünvanlanan suallar ətraflı cavablandırılmış, maraqlı müzakirələr aparılmışdır.
"Açıq Qapı" tədbirində ziyarətçilərlə aparılan maarifləndirici söhbətlər muzeylərin gənc nəslin milli-mənəvi dəyərlər ruhunda tərbiyə olunmasında, ədəbiyyata marağın artırılmasında mühüm rol oynadığını bir daha nümayiş etdirmişdir.

“Açıq qapı” tədbirində Kürdəmir rayon İcra Hakimiyyətinin başçısı Elşən Həsənli də iştirak etmişdir. O, muzeyi ziyarət edərək ekspozisiyalarla yaxından tanış olmuş, muzeyin fəaliyyəti və burada Azərbaycan klassik ədəbiyyatı və mədəniyyətinin təbliği məqsədi ilə həyata keçirilən maarifləndirici tədbirləri yüksək qiymətləndirmişdir.

Regionun yetirmələri olan məşhur elm, mədəniyyət və ədəbiyyat xadimlərinin əsərlərin ibarət olan sərgi ziyarətçilərin diqqətini cəlb eləmişdir. Tədbirdə Muzeyin nəzdində fəaliyyət göstərən Aran Ədəbi Birliyinin üzvləri də  öz kitabların təqdim etmiş, onlar üçün təşkil olunmuş  musiqili-ədəbi məclisdə yeni şeirlərini səsləndirmişlər.

Tədbirin bədii hissəsi də ziyarətçilər tərəfindən maraqla qarşılanmışdır. Məktəblilər Nizami Gəncəvinin, Məhəmməd Füzulinin, Xaqani Şirvaninin və İmadəddin Nəsiminin, Mirzə Ələkbər Sabirin, Hüseyn Cavidin, Səməd Vurğunun şeirlərindən nümunələr səsləndirmiş, ədəbiyyatımıza olan maraq və sevgilərini nümayiş etdirmişlər. Onların dahi bəstəkar Üzeyir Hacıbəyovun "O olmasın, bu olsun" əsərindən təqdim etdikləri səhnəcik iştirakçılar tərəfindən böyük maraq və alqışla qarşılanmışdır. Səhnəcik tədbirə xüsusi rəng qataraq qonaqlarda xoş təəssürat yaratmışdır.

Sonda muzeyi ziyarət edən qonaqlar Beynəlxalq Muzeylər Günü münasibətilə muzey əməkdaşlarını təbrik edərək, rəy və təkliflər kitabına ürək sözlərini yazmış, muzeyin fəaliyyətini yüksək qiymətləndirmiş, ekspozisiya ilə tanışlıqdan məmnun qaldıqlarını bildirmişlər. Onlar belə tədbirlərin mütəmadi keçirilməsinin vacibliyini vurğulayaraq, muzey kollektivinə gələcək fəaliyyətlərində uğurlar arzulamışlar.

Qeyd edək ki, Ədəbiyyat Muzeyində keçirilən Açıq Qapı Günü milli-mədəni irsimizin təbliği, cəmiyyətin ədəbiyyata marağının artırılması baxımından mühüm əhəmiyyət daşıyır.

Muzeyin əməkdaşları gün ərzində muzeyi ziyarət edənlərə Azərbaycanın mədəni irsi, eləcə də klassik ədəbiyyatımız barədə ətraflı məlumat vermiş, onları müxtəlif mədəniyyət nümunələri, rəsm və heykəltaraşlıq əsərləri ilə yaxından tanış etmişlər. Ziyarətçiləri, xüsusilə məktəbliləri maraqlandıran suallar muzey əməkdaşları tərəfindən cavablandırıldı və onlar böyük həvəslə muzeydə xatirə şəkilləri çəkdirdilər.