Türkiyə prezidenti Rəcəb Tayyib Ərdoğanla İstanbulda Ermənistanın baş naziri Nikol Paşinyan arasında danışıqlar başa çatıb. 

Adalet.az xəbər evrir ki, görüş 1 saata yaxın davam edib.

Ermənistan Nazirlər Kabinetinin mətbuat xidmətinin məlumatına görə, Paşinyan Ermənistanın regionda sülh və sabitliyin təmin edilməsi prosesinə sadiqliyini və qonşuları ilə münasibətlərin normallaşdırılması siyasətini davam etdirdiyini vurğulayıb.

İki ölkənin liderləri birbaşa təmasları və dialoqu davam etdirməyə hazır olduqlarını təsdiqləyiblər.

Türkiyə prezidentinin ofisindən verilən məlumata görə, Paşinyan və Ərdoğan İrəvan və Bakı arasında sülh yolu ilə nizamlanma, həmçinin Ermənistan-Türkiyə münasibətlərinin normallaşdırılması məsələlərini müzakirə ediblər.

***20:16

İstanbul şəhərində Türkiyə Prezidenti Rəcəb Tayyib Ərdoğanla Ermənistanın baş naziri Nikol Paşinyan arasında görüş başlayıb.

Adalet.az xəbər verir ki, bu barədə TRT telekanalı məlumat yayıb.

İki liderin məhdud tərkibdə görüşü Dolmabağça sarayında keçirilir.

Qeyd edək ki, bu gün N.Paşinyan Türkiyə Prezidenti Rəcəb Tayyib Ərdoğanın dəvəti ilə bu ölkəyə ilk işgüzar səfərə gedib.

Paşinyanı səfərdə XİN rəhbəri Ararat Mirzoyan, XİN rəhbərinin müavini Vahan Kostanyan, parlamentin vitse-spikeri, Türkiyə ilə münasibətlərin normallaşması prosesində Ermənistanın xüsusi nümayəndəsi Ruben Rubinyan müşayiət edir.