“Rusiyanın hərbi strukturlarının AZAL təyyarəsini vurması əlbəttə ki, bu bütün dünyada ciddi rezonans vermiş hadisə idi. Burda əsas məqam ondan ibarət idi ki, həm dinc sərnişin təyyarəsi vurulub, həm də o təyyarənin eniş edilməsinə icazə verilmir.  Radarlar bağlanır və ona görə pilotlar təyyarəni Qazaxıstan istiqamətinə sürür və orda da ağır qəza baş verir, insanlar həlak olur”. 

Bunu Adalet.az-a açıqlamasında professor Qulu Məhərrəmli deyib. 

Onun sözlərinə görə, bu hadisədə Rusiyanın riyakarlığı ondan ibarətdir ki, əvvəlcə bu hadisəni danmağa çalışdılar:

“Cürbəcür versiyalar irəli sürdülər, amma nəhayətdə belə yüngülvari etiraf etməyə məcbur oldular ki, bəli, bu təsadüfən vurulub. Təyyarə təsadüfən vurulanda açıq şəkildə üzr istənilir, ölkəyə dəymiş maddi ziyan, həlak olmuş insanların ailələrinə təzminat ödənilir. Yəni bunlar hamısı dünya təcrübəsində olmuş məsələlərdir. Amma bu hadisədə Rusiya özünü o qədər azğın və həyasız apardı ki, bu da insanları çox qıcıqlandırır. Dünən “Eurows” kanalı bununla bağlı süjet verdi və orda Qazaxıstan mütəxəsissləri açıq şəkildə söylədilər ki, təyyarə vurulub. Çünki onun gövdəsində mərmi yerləri var və təyyarənin qəzasına da səbəb ona atəş açılması olub. Yəni bu bir daha Rusiyanın sifətini, necə riyakar siyasət aparmağını göstərir”. 

Q.Məhərrəmli deyib ki, Rusiya bir tərəfdən müttəfiqlik müqaviləsi imzalayır, o biri tərəfdən sərnişin təyyarəsinə hücum edir, günahını boynuna almır, təzminat ödəmir:

“Yəni bütün bunlar hamısı onu deməyə əsas verir ki, Rusiya nə qədər qorxulu, nə qədər etibarsız, nə qədər güvənsiz bir ölkədir. Onunla nə bir ittifaq müqaviləsi, nə də bir mehriban dostluq, qonşuluq siyasəti yetərli deyil. Rusiya həmişə güc mövqeyindən danışmağa çalışır. Bu Ukraynada da, Moldovada da, Baltikyanı ölkələrdə də elədir. Ona görə də Rusiya neçə əsrdi ki, bütün Avropa, dünya üçün təhlükə mənbəyidir və bunun zərərsizləşdirilməsi üçün Avropa və Qərb müvafiq addımlar atmalıdır”. 

Vasif