Azərbaycanda boşanan tərəflər bir-biriylə düşmən olur, qanlı bıçaq olur və bəzən hətta olmayan varidatlarının üstündə qırğın düşür. Bu cəhənnəm, ər boşadığı arvadını sonradan qısqanıb gedib öldürür də. Bəzən nəinki boşadığı arvadını, qayınatasını, qayınanasını, hətta qaynını belə öldürür.
Biz nə təhər müsəlmanıqsa, boşanma ilə bağlı peyğəmbərin qoyduğu qanunlara da əməl etmirik.
Sizə qəribə bir hadisə danışmaq istəyirəm.
İki-üç il bundan əvvəl İsveçrədə yaşayan Vural Baydan adlı bir ıqdırlı dostum məni ailəlikcə İsveçrəyə dəvət etmişdi.
Çox qəribə bir insandır. Onu da deyim ki, Türkiyədə nəşr olunan «Dolu» romanımı oxumuşdu, sonra filmə də baxmışdı. Xocası Seyfəddin Altaylı vasitəsilə məni axtarıb tapmışdı, İzmirə dəvət etmişdi və orda «Dolu» filminin təqdimatını keçirmişdi. Beləcə salam-sabahımız yaranmışdı.
Və günlərin birində gördüm ki, mənə iki bilet göndərib Sürixə. Və xanımımla getdik Sürixə. Bir on gün onun qonağı olduq.
İsveçrədə sayılıb-seçilən kişilərdən biridi.
Deməli, bu, İsveçrədə yaşayanda (təxminən 40 il orda yaşayıb) bir alman qadınla evlənib və ondan iki oğlu və bir qızı var. Böyük oğlu da futbolçudu. Sonra boşanıblar və gəlib İzmirdən bir xanımla evlənib ondan da bir qızı var.
Və bir gün dedi ki, Ursula (boşadığı xanım) eşidib ki, Azərbaycandan qonaqlarım gəlib bizi yeməyə dəvət edir.
Ayrılıblar və adam kimi ayrılıblar, yenə ünsiyyət saxlayırlar. Düzdür, övladları anası ilə qalır, amma o da öz atalıq borcunu yerinə yetirir.
Nə isə, bizə bu dəvət təbii ki, təəccüblü gəldi. Əgər xanım boşandığı ərinin qonaqlarına belə hörmət bəsləyirsə, görün öz ərinə nə qədər hörmət bəsləyir.
Bir maraqlı da söhbət. Deməli, gedirik Ursula xanımgilə qonaq.
Xanımım soruşdu:
-Vural bəy, biz xanımınla necə söhbət edəcəyik, heç olmasa bir az türkcə bilir?
- Qətiyyən, türkcə bilmir. Ursula uzun müddət Iqdırda anamın yanında yaşayıb, yalnız azərbaycanca bilir.
Xeyli güldük. Bilməyənlər bilsinlər ki, Iqdırda, Qarsda, hətta Ərzurumda yaşayanlar özlərini Türkiyə türkü yox, Azərbaycan türkü sayırlar. Məsələn, mən Iqdırda, Qarsda olanda elə bilirdim Ağdamdayam, Ağcabədidəyəm.
Sözümün canı nədir? Boşananda adam kimi boşanın.