Haqq yoludur yolumuz,

Yol gedirik sabaha.

Qələbədir andımız,

Bitməlidir bu dava.

"Ya Qarabağ, ya ölüm",

Yox geriyə yol daha.

Öndə öndər oğludur,

İlham Heydər oğludur.

Erməni sümsüyünə,

Nankora yox amanım.

Bütövlükdür əhdimiz,

Yaşa, Azərbaycanım.

Xor oxuyur cərgəmiz,

Öndə baş komandanım -

Ulu öndər oğludur,

İlham Heydər oğludur.

İşğalçılar əzilsin,

Biz yenilməz hünərik.

Torpağımdan çəkilsin,

Tarix yazan zəfərik.

Göylərə bayraq çəkən,

Ay-ulduzlu əsgərik.

Öndə öndər oğludur,

İlham Heydər oğludur.

Şuşamın zirvəsində,

Hilalımı görürəm.

Şəhidlərin səsində,

Əməlimi görürəm.

Murovun sinəsində,

Heykəlimi görürəm, -

Öndər zəfər oğludur,

İlham Heydər oğludur.

Qalx, ulusal Vətənim,

Xoş sabaha gedirik.

Ucal, ucal Vətənim,

Bütöv çağa gedirik.

Əl çal, əl çal Vətənim,

Qarabağa gedirik.

Başda öndər oğludur,

İlham Heydər oğludur.

 

 

ŞƏHİDİ ALLAH SEVƏR

Ucalardan ucasan

Ucalar uca olur.

Ucalığa ucalan

Günəşcə, Ayca olur.

 

 

Bu sevginin sirrini,

İgidlər bilər ancaq.

Ucalığın yerini

Şəhidlər bilər ancaq.

 

 

Sən əsgər şərəfini

Ən müqəddəs borc sandın.

Yardı düşmən səfini

Əzmin, döyüşçü andın!

 

 

Torpağın hər qarışı

Candan əzizdi sənə.

Bu ellərin alqışı

Coşqun dənizdi sənə.

 

 

Döyüşlərə atıldın

Susdurdun neçə düşmən.

Səni bağrına basdı,

Qoruduğun bu Vətən.

 

 

Şəhidi Allah sevər,

Nurlu nəğməyə döndün.

Şəhidlik uca zirvə,-

Özün zirvəyə döndün.

 

 

AZƏRBAYCAN-TÜRKİYƏ

 

Ulu torpaq, mərd diyar,

Canım, gözüm, bəxtiyar.

Min könüldən oxuyar,

Sarılaraq sevgiyə -

Azərbaycan-Türkiyə.

 

 

Gəzərəm odlu-odlu,

Qara dəniz nə mutlu.

Bakı, Ceyhan umudlu

Qanad açar zirvəyə

Azərbaycan-Türkiyə.

 

 

Təbrizim, Qarayazım,

Qarabağım, Kıprızım.

Oxuyur tarım, sazım

Bir olsun ellər deyə,

Azərbaycan-Türkiyə.

 

 

İstanbul, Bakı qardaş,

Ərzurum, Şəki qardaş.

Naxçıvan ulu sirdaş

Dönüb yola, körpüyə

Azərbaycan-Türkiyə.

 

 

Muxtar QASIMZADƏ

Naxçıvan