Əbülfət Mədətoğlu: Səni Vətən bildim
"Bir qadına..." silsiləsindən
Açılan səhərə nəqarət oldu
Sənin təbəssümün, sənin nəfəsin...
İçimə müqəddəs bir ümid doldu -
Sevincdən çartlatdı, ürək qəfəsin!
Boylandım durmadan ,əlim qaşımda
Dağların yolunu gözümdən asdım...
Torpaq həsrətimi mən bu yaşımda -
Sonuncu nəfəs tək dözümdən asdım...
Əyilən dumana, çənə büründüm
Amma itirmədim çığırı, izi...
Tutub ətəyindən , hətta süründüm -
Gördüm ki, qanadı xəyalın dizi!..
Açılan səhərə Günəş tək gələn,
Çək mənim sevgimin şəklini göyə...
Həsrəti mənimçün ianə bilən -
Səni Vətən bildim - çox sevdim deyə!