Əbülfət Mədətoğlu: Birgə
" Özümdən özümə" silsiləsindən ...
Solan yarpaqlara sızlamıram tay
Qədərin yaşayır mənimlə birgə...
Sıxıb kirpikləri duzlamıram tay -
Kədərin daşıyır mənimlə birgə...
Üyünən günləri ələyə yığıb
Cılğa ümidləri bələyə yığıb
Bu ömrü üst-üstə - şələyə yığıb -
Gedirəm yolumu, tənimlə birgə...
Bu sayda barmaq yox, dizim qatlanır
Keçdiyim yollarda izim qatlanır...
Vüsala sonuncu ümid atlanır -
Allah, ürəyimə qənimlə birgə!
Avazım xoş deyil - olanımdı bu
Lilənən didəmə dolanımdı bu...
Bəlkə də , gözlənən son anımdı bu -
Gəlir dumanımla, çənimlə birgə...