Bu gün Mədəniyyət Nazirliyinin təşkilatçılığı ilə Bakı Ekspo Mərkəzində 12-ci Bakı Beynəlxalq Kitab Sərgisinin rəsmi açılış mərasimi keçirilib.

Adalet.az xəbər verir ki, açılış mərasimində mədəniyyət naziri Adil Kərimli, Azərbaycan Yazıçılar Birliyinin sədri Anar, Milli Elmlər Akademiyasının (AMEA) prezidenti İsa Həbibbəyli, Milli Məclisin deputatları, hökumət rəsmiləri, ədəbiyyat, elm və mədəniyyət xadimləri, tanınmış ziyalılar, xarici qonaqlar və çoxsaylı kitabsevərlər iştirak ediblər. 

Çıxış edənlər sərginin mütaliə mədəniyyətinin formalaşmasındakı rolunu və uşaqların rəqəmsal asılılıqdan uzaqlaşaraq kitaba yönəlməsinin vacibliyini vurğulayıblar.

Builki sərgi “Həyat ekrandan böyükdür: bir uşaq, bir kitab, bir gerçək dünya” şüarı altında təşkil olunub.  Oktyabrın 27-nə qədər davam edəcək sərgidə yerli nəşriyyatlarla yanaşı, onlarla xarici ölkədən olan polifrafiya müəssisələri və yazarlar iştirak edir. Festival çərçivəsində tanınmış yazıçıların imza günləri, uşaqlar üçün ustad dərsləri, rəngli təqdimatlar və panel müzakirələri təşkil olunacaq.

Qeyd edək ki, sərgi müddətində ziyarətçilərin Bakı Ekspo Mərkəzinə rahat gediş-gəlişini təmin etmək üçün metronun “Koroğlu” stansiyasından xüsusi avtobuslar fəaliyyət göstərir. Giriş pulsuzdur.