Roma Universiteti Tor Verqatadan olan astronomların araşdırmasına görə, aktiv supermassiv qara dəliklərin yaydığı yüksək enerjili hissəcik axınları uzaq planetlərin atmosferinə zərər verə və ozon təbəqəsini məhv edə bilər.

Adalet.az xəbər verir ki, “Monthly Notices of the Royal Astronomical Society” jurnalında dərc olunan tədqiqatda alimlər Süd Yolunun mərkəzində yerləşən Oxatan A* qara dəliyini araşdırıblar. Hazırda nisbətən sakit olan bu obyektin keçmişdə daha aktiv olduğu bildirilir.

Hesablamalara görə, qara dəliyin fəaliyyəti axınların gücündən asılı olaraq, təxminən min işıq ili və ya daha çox məsafədəki planetlərə təsir göstərə bilər. Yüksək enerjili hissəciklər atmosferi qızdıra, qaz itkisini sürətləndirə və ozon təbəqəsini zəiflədə bilər. Bu isə planetlərin səthini zərərli ultrabənövşəyi şüalanmaya qarşı daha həssas edə bilər.

Bununla belə, tədqiqat bütün bu məsafədəki planetlərin atmosferini itirəcəyini və ya yaşayış üçün yararsız hala düşəcəyini göstərmir. Təsirin miqyası qara dəliyin aktivliyindən və hissəcik axınlarının xüsusiyyətlərindən asılıdır.