Cənab Prezident İlham Əliyev Münhendə BMT rəhbərliyi ilə görüşəndə deyib ki, ATƏT-in Minsk qrupu ləğv olunmalıdır. Doğrudan da bu qrup fəaliyyəti boyunca  bir qara qəpiklik iş görə bilməyib. Amma əvəzində yaxşı maaş alıblar, gəliblər Bakıya görmədikləri günləri görüblər. Səhər qəhvəaltısında Gəncə qaymağı, Gədəbəy balı, Şamaxı şoru, kürü, kənd yumurtası, Şəmkir konyakı. Günorta  quzu qabırğası, erkəyin ağ əti, döymə kabab, tut arağı. Axşam da cücə plov, şah plov, fisincan plov, yeyib-içib  kef ediblər. Bir az da boş-boş zəvziyib gediblər İrəvana. İrəvanda da Həkərinin qızıl balığı, İrəvan konyakı vurublar özləri  üçün, amma orda boş-boş danışmayıblar. Bir az dolu danışıblar, ermənilərə  deyiblər ki, arxayın  olun arxanızda durmuşuq, nə qədər  biz varıq Qarabağ  sizindir. 

Və sonda Qarabağ Ermənistanın yox, əsl sahibi Azərbaycanın  oldu. 

Mənim fikrimcə, yaxşı olar ki, ATƏT-in Minsk qrupunu göndərsinlər Qəzza zolağına, bir az Ərəbistanın isti havası onları hövsələdən çıxarsın.  

Amma getməzlər. Kim cənnət Azərbaycanı və Göyçəni qoyub gedər Qəzzaya. Ona görə də indi başqa bir adla tökülüb gəliblər Ermənistana və sərhəd boyu durbinlə  Azərbaycana baxıb  kef çəkdikləri günləri  yada salırlar.