Qələmdən silaha sarılanlar
Uşaq ədəbiyyatının incilərini yaradan Abdulla Şaiq yazırdı ki, hər millətin
tərəqqisi və fəaliyyətinin başlıca amilini elm və əxlaqı aşılayan müəllim yaradır.
O müəllim ki, cəmiyyətin maariflənməsində müqəddəs dəyər hesab olunur. Müəllim
gələcəyin təməlidir, onlar bəşər üçün ən faydalı olanı öyrədir, aydınlığa gedən bir
yolda çıraq təsiri bağışlayır. Mənim üçün dünyada nə qədər elm sahəsi varsa,
onların bir açarı və lideri var – müəllim. Bu ucalıq cəmiyyətin şərəfi və dəyəridir.
Müəllim olmazsa, cəmiyyət büsbütün uçurumun kənarında yer alar. Niyyəti,
məramı cəmiyyəti “manqurtlaşmaqdan” xilas edən bu incilər içərisində iki vəzifəni
bir anda yerinə yetirə bilən şəxslər də oldu. Bunlar eyni anda qələmdən silaha
sarılan bir neçə müəllim kütləsi idi. Bu yerdə Sədi Şirazinin “Bustan” əsərindən bir
parça lap yerinə düşür:
Bir ağıllı adam, bir də qəhrəman,
Adını yüksəldər sənin hər zaman.
Kim ki qılınc, ya da qələm tuta bilməsə,
Ona heç acıma, yıxılıb ölsə.
Qələm tutmağı öyrədən həmkarlarımdan Qarabağ savaşında iştirak edənlər də
oldu. Azərbaycanın ərazi bütövlüyü uğrunda haqq savaşı başlayar - başlamaz
Vətən kəlməsinin müqəddəsliyini aşılayan bu müəllimlər könüllü olaraq Vətənin
müdafiəsinə qalxdılar. Müəllim kimi sənətinin haqqını verən bu oğullar döyüş
qabiliyyətlərini də nümayiş etdirərək xidmətlərində fərqləndilər. Bir pedaqoq
olaraq, qələm və silaha sarılan bu müəllimlərin həyatını işıqlandırmaq mənim üçün
şərəf və qürurdur. Çünki hər bir Azərbaycan gənci öz qəhrəmanlarını tanımalı, istər
onların qələmindən, istərsə də döyüş təcrübələrindən özlərinə bir pay
götürməlidirlər.
Böyük zəfərdə sarsılmaz inamları və əzmləri ilə payı əvəzsiz olan müəllimlərdən
Rahim Xubalıyev, Eyvaz Əyyub, Emin Piri, Məhəmməd Məhəmmədov kimi
müəllimlər sözün əsl mənasında timsaldır. “Öncə Vətən!” kəlməsini deyən bu
oğullardan incə təbiətli, şair ruhlu olanlar da az deyil. Emin Piri kimi ecazkar
poetik nümunələr yaradan, Eyvaz Əyyub kimi unudulmaz və təsirli bir poeziya
formalaşdıran bu oğullar artıq şagird qarşısında cümlə qurarkən qürurla öz adları
olan nümunələr gətirməkdən çəkinmirlər. İndi onların yaradıcılığında vətən və
qəhrəmanlıq ön plandadır. Məmməd Araz demişkən:
Nə zaman ki qələm gəlir əllərinə,
Vətən gəlir dillərinə.
Sözü sözdən seçməyi bacaran belə oğullar “Vətəndən pay olmaz!” şüarına əsasən,
vətən qarşısındakı borclarından bir daha şərəflə çıxmağı bacardılar.
Xəyalə Həmzəliyeva
Sumqayıt şəhər Evdə Fərdi Təhsil Məktəbinin müəllimi