Əyyub Türkayın şeirləri
QOL SAATI
Qol saatın çox sevir,
Bizim üç yaşlı Aygün.
Qələmlə öz qoluna
Saat çəkirdi hər gün.
Elə bilir qoluna
Gerçək saat bağlayır.
Çəkdiyi saat şəkli
Silinəndə ağlayır.
Atası bunu gördü,
Birdən yadına saldı.
Balaca dəcəl qıza
Oyuncaq saat aldı.
Aygün çox sevinirdi,
Artıq saat taxırdı.
Üzündə xoş təbəssüm
Atasına baxırdı.
CÜCƏLƏR
Qorxdular
Cücələr,
Qışqırdı
Beçələr.
Xoruzlar
Banladı,
Onları
Danladı.
Yatdılar
Cücələr,
Sakitcə
Gecələr.
MƏNİM ANA DİLİM
Öz tarixi günü var,
Mənim ana dilimin.
Azərbaycandır adı
Mənim doğma elimin.
Öyrəndim əlifbanı
Birinci sinifdə mən.
Sevinərək yazıram,
Əziz ana, can Vətən!
Dilimizi qorumaq
Ən uca, xoş məramdır.
Öz dilimin varlığı
Mənim üçün bayramdır.
ANA VƏTƏN
Bir sual var ki, tez-tez
Düşündürürdü məni.
Anaya bənzədirlər
Axı niyə Vətəni?
Bu sualın ən gözəl
Cavabın anam verdi.
Dedi: -Vətən bizlərə
Candan əziz bir yerdi.
Bu eldə, bu obada
Yaşamışıq əzəldən.
Bizə mirasdır torpaq,
Verə bilmərik əldən.
Sevməlisən yurdunu,
Doğmaca anan qədər.
"Ana", "Vətən" sözünü
Tutmalısan bərabər.
XARIBÜLBÜL
Niyə çoxdur dəyəri,
Bildim xarıbülbülün.
Adını Şuşamızla
Bir çəkirlər bu gülün.
Artıq bu gül çevrilib
Qələbənin rəmzinə.
Sevilərək döşənib
Qarabağın düzünə.
Bir zaman düşmənlərə
Əsir düşmüşdü gülüm.
İndi azadlıqdadır,
Mənim xarıbülbülüm.
CƏMİLİN YUXUSU
Kitabları əzməyi
Cəmil çox xoşlayırdı.
Əlinə keçən kimi
Cırmağa başlayırdı.
Girdi bir gün kitablar,
Cəmilin yuxusuna.
Onlar səbəb oldular
Uşağın qorxusuna.
Kitablar danışırdı
Bir-birinin dilindən.
Əl atıb yapışdılar
Oğlanın kəkilindən.
Hərəsi öz haqqını
Tələb edirdi ondan.
Cəmil heyrətə gəldi
Bu qorxulu oyundan.
O diksinib oyandı,
Kitabları axtardı.
Onları incitməyi
Birdəfəlik qurtardı.
BABAMA MƏSLƏHƏTİM
Artıq babam yaşlanıb,
Edib ömrünü yarı.
Papirosu çəkməkdən
Olub bığları sarı.
Mən baxıram babamın
Bu saralmış bığına.
Elə bil ki, batıbdır,
Lap xörəyin yağına.
Söylədim ki, ay baba
Bərbər bığını qırxsın.
Güman var ki, yerində
Təzə bığın ağ çıxsın.
Verdiyim bu məsləhət
Gəlmədi acığına.
Babam gülümsəyərək
Əlin çəkdi bığına.
Əyyub Türkay- şair