Əbülfət MƏDƏTOĞLU: YUXUDU BƏLKƏ...
"Bir Qadına..." silsiləsindən
Bəlkə də bir yuxudu bu,
Mən gerçək bildiyim yuxu...
Kirpiklərinin ucundan -
Səssizcə sildiyin yuxu...
Nə əlini əlim geyib,
Nə telinə toxunmuşam...
"Ya Allah"- ı içdən deyib
Bir misra tək oxunmuşam...
Görüş yeri də yuxudu,
Yanaqdan öpdüyüm an da!
Yuxudu Covid testində -
Sevginin çıxması qanda...
İçimdə hər gün alışan,
Yuxudu-avqust tonqalı...
Şəkilə köçüb danışan -
Yuxudu, ömrün yonqarı...
Hətta buludlar üstündə,
Allaha edilən dua...
Yuxudu, itib tüstümdə -
Sinəmdə közərən yuva!
Yuxudu yazılan şeir,
Doğulub qərib şəhərdə...
Yuxudu- ruhu yuata -
Götürən bax , bu qəhər də!