Külü iki ölkəyə sovrulan yazıçı
Dünya şöhrətli ispandilli yazıçı, 2 il öncə Meksikada
dünyasını dəyişmiş Qabriel Qarsia Markesin külü ölkəsi – Kolumbiyaya göndərilib.
Adalet.az xarici mediaya istinadən bildirir ki, Markesin külü yazıçılıq
karyerasına başladığı liman şəhəri Kartagenaya gətirilib. Şəhərdə Markesin ailəsi,
dostları, sevənləri bir araya toplaşaraq, mərasim təşkil ediblər. Mərasimdə yazıçının
xatirəsinə bürünc büstün açılışı edilib və külün bir hissəsi məzar daşındakı
xüsusi yerə yerləşdirilib. Qalan hissəsi isə 2014-cü ilə qədər yaşadığı
Meksikaya göndərilib.
Dünya ədəbiyyatına kult əsərlər bəxş etmiş Markesin
ən məşhur romanı "Yüz ilin tənhalığı”dır. Bundan başqa "Polkovnikə məktub
yoxdur”, "Labirintdəki general”, "Qırmızı bazar ertəsi”, "Vəba günlərində eşq”,
"Gözlənilən qətlin tarixçəsi” və s. əsərləri ilə milyonların ürəyini qazanıb.
"Magik realizm” cərəyanının öncüllərindən olmuş Markes
1982-ci ildə Nobel mükafatına layiq görülüb.