İki gecə bəs edərmi?
Etibar CƏBRAYILOĞLU
Nəcəf bəy Vəzirov adına Lənkəran Dövlət Dram Teatrının Bakı qastroluna söz ardı
Birinci gecə-
"Ruhlar"
Qastrolun birinci günü
Lənkəran Dövlət Dram Teatrı İtaliya neorealizminin banisi, dramaturq Eduardo de
Filipponun "Ruhlar" komediyasını təqdim etdi. Tamaşaya teatrın baş
rejissoru Tural Mustafayev quruluş verib. Quruluşçu rəssam Mustafa Mustafayev,
musiqi tərtibatçısı Telman Qəniyevdir.
"Ruhlar"
insanın həyatda yerini tapmaq uğrundakı mübarizəni əks etdirir. Əsərin çox sadə
süjet xətti var - böyük, cazibədar bir malikanənin sahibi ruhlar barədə dolaşan
şayiələr ucbatından bu imarəti icarəyə verməkdə çətinlik çəkir. Nəhayət o,
bütün bu gəzən söz-söhbətə son qoymaq üçün malikanəni yeni evlənmiş cütlüyə təmənnasız
kirayəyə verməyi qərara alır. Ruhların dolaşdığı ev kimi məşhur olan bu sarayda
həyat yoldaşı Mariya (Aynur Əhmədov) ilə birlikdə yaşamaqla əsərin baş qəhrəmanı
Paskuala (Əbülfəz Axundov) şəhər sakinlərini inandırmalıdır ki, evdə heç bir
ruh yoxdur.
Paskuala Alfredo (Tərlan
Abdullayev) ilə bağladığı "saziş" barədə arvadına heç nə demir. Amma
nəticə etibarı ilə o, arvadının məşuqunu (Əməkdar artist Adil Zeynalov)
ruhlara bənzətməklə gülünc vəziyyətə
düşür. Hadisələr bir-birini əvəz etdikcə tamaşaçı Paskualanın pula, sərvətə görə
necə alçaldığının şahidi olur.
Aktyor Əbülfəz Axundov
zavallı, miskin Paskualanın pula hərisliyini, simasızlığını və mənəviyyatsızlığını
bacarıqla göstərməklə mürəkkəb obrazın öhdəsindən gəlməyə çalışır.
Lənkəran Dövlət Dram
Teatrının nəzdindəki studiyanın yetirmələri Tərlan Abdullayev və Gülər Kərimova
öz ifaları ilə Əməkdar artist Adil Zeynalov, Qızılgül Quliyeva, Miraslan
Ağayev, Aynur Əhmədova, Niftulla Əsgərov kimi təcrübəli, müxtəlif xarakterli
obrazlar oynamış aktyorlardan ibarət ümumi ansambldan geri qalmadıqlarını göstərmək
istəyirlər. Gənclər bu istəyinə nail olurlar.
Tamaşanın yaradıcı heyəti
seyrçilərin diqqətini günümüzlə səsləşən məsələyə yönəldir. Cəmiyyətdəki sosial
problemlərə, maddi sıxıntılara baxmayaraq insan hər zaman müqəddəs dəyərləri, mənəviyyatını
qorumağı bacarmalıdır. Əks halda ətrafdakıların gülüş hədəfinə çevrilərək məhv
ola bilər...
Yeri gəlmişkən, Lənkəran
səhnəsində hazırlanan "Ruhlar" tamaşası I Şəki Beynəlxalq Teatr Festivalında
uğurla nümayiş olunub və təşkilat komitəsinin diplomu ilə mükafatlandırılıb.
Bakı qastrolunun
birinci günü oynanılan tamaşanı mədəniyyət
və turizm naziri Əbülfəs Qarayev, nazir müavini Ədalət Vəliyev, parlamentin
komitə sədri Hadı Rəcəbli, teatr ictimaiyyətinin nümayəndələri, əslən cənub
bölgəsindən olan ziyalılar maraqla izlədilər.
İkinci gecə- "İlan
Sultan"
Qastrolun növbəti günü
Lənkəran Dövlət Dram Teatrının aktyorları daha bir maraqlı səhnə əsəri ilə
paytaxt tamaşaçılarının qarşısına çıxdılar. İranlı yazıçı Bəhram Beyzayinin
eyni adlı əsəri əsasında hazırlanan "İlan Sultan" tamaşası iki gəncin saf məhəbbətindən, mürəkkəb
və gözlənilməz hadisələrdən sonra vüsala yetişmələrindən bəhs edir. "İlan
Sultan"a müəllifin vətənindən dəvət edilən gənc rejissor Xeyrullah Təqyanipur
quruluş verib. Tamaşanın baş məsləhətçisi Atabəy Naderi (İran), quruluşçu rəssamı Tərlan Sadıqov, musiqi tərtibatçısı
isə İlqar Əliyevdir.
Tamaşada əsas rolları Əməkdar artist Sucəddin Mirzəyev
(Salnaməçi), aktyorlardan Sayad Əliyev (İran Sultan), Aynur Əhmədova (Nigar
xanım), Qızılgül Quliyeva (Dayə), Miraslan Ağayev (Vəzir), Əlibala Əsgərov
(Şah), Emin Fərzullayev, Emil Rzayev (Divlər), Tərlan Abdullayev (Darğa),
Nizami Qurbanov (Təlxək), Gülər Kərimova, Şəbnəm Hüseynova (səfirlər) ifa edirlər.
Maraqlı səhnə əsəri gənclərdə vətənpərvərlik hissi aşlayır, dövlətin, torpağın
müqəddəs bir nemət olduğunu diqqətə çatdırır.
Aktyorlardan əvvəl səhnəyə
dəvət edilən İran İslam Respublikasının Azərbaycandakı səfirliyinin Mədəniyyət
Mərkəzinin rəhbəri İbrahim İbrahimi həmvətəni Bəhram Beyzayinin qələmə aldığı əsərin
Lənkəran Dövlət Dram Teatrında səhnəyə qoyulmasını mühüm mədəni hadisələrdən
biri kimi xarakterizə etdi. Ağayi İbrahimi bu istedadlı kollektivlə gələcək əməkdaşlıqda
maraqlı olduqlarını bildirdi və birgə layihələr həyata keçirmək istəyində
olduqlarını dedi.
Qeyd edək ki,
"İlan Sultan" tamaşası bu ilin yanvarında İran İslam Respublikasının
paytaxtı Tehranda ənənəvi keçirilən Beynəlxalq
Fəcr Teatr Festivalı çərçivəsində qonşu ölkənin Təbriz və Məşhəd şəhərlərində
uğurla oynanılıb. Quruluşçu rejissor Xeyrullah Təqyanpur festivalda "Ən
yaxşı rejissor işi" nominasiyasının qalibi olub.
Teatrın direktoru Tofiq
Heydərov bizimlə söhbətdə iki günlük Bakı qastrolunun yekunlarını müsbət qiymətləndirdi:
"Tələbkar Bakı tamaşaçıları, hörmətli sənət müəllimlərimiz, teatr tənqidçiləri
qarşısında çıxış etmək bizim üçün böyük məsuliyyətdir. Çox şadıq ki, iki gün ərzində
tamaşaçılar kollektivin ərsəyə gətirdiyi səhnə əsərlərini maraqla qarşıladılar.
Bu şəraiti bizə yaratdığı üçün Mədəniyyət və Turizm Nazirliyinin rəhbərliyinə
minnətdarlığımızı bildiririk. Gündəlik işimizdə nazirliyin diqqət və qayğısını
daim hiss edirik. Qastrolun ilk günü hörmətli nazirimiz Əbülfəs Qarayev, nazir
müavini Ədalət Vəliyev tamaşamıza gələrək bizə mənəvi dayaq oldular.
Lənkəran Şəhər İcra
Hakimiyyətinin başçısı Taleh Qaraşov da kollektivdən diqqət və qayğısını əsirgəmir.
Biz də yaradılan şəraitdən ruhlanaraq ölkəmizin mədəni həyatına, teatr sənətinin
inkişafına öz töhfələrimizi verməyə çalışırıq. Tez-tez Azərbaycanı və
rayonumuzu beynəlxalq festivallarda uğurla təmsil edirik. Qonşu İran İslam
Respublikasında və Türkiyədə keçirilən teatr festivallarından yeni dəvətlər
almışıq. İstəyirik ki, həmin festivallarda da seçilən teatrlardan biri
olaq".
Son illər maraqlı səhnə
əsərləri ilə yenidən diqqət mərkəzinə düşən Lənkəran Dövlət Dram Teatrının iki
günlük Bakı qastrolu uğurla başa çatdı. Bu istedadlı kollektivin yaradıcılıq
yeniliklərinə baxmaq üçün iki gecə bəs edərmi?
Deməli, növbəti görüşləri gözləmək lazımdı...