“Düşünmürəm ki, YAP Azərbaycan xalqının düşmənidir”
Azərbaycan Xalq Cəbhəsi Partiyasının sədri Razi Nurullayevin adalet.az-a müsahibəsi
-Razi bəy, Ədliyyə naziri sənədlərinizi geri qaytardı. Bundan sonra hansı addımlar atacaqsınız?
-Təbii ki, gözləyirdik.
Artıq məsələ məhkəmə müstəvisinə çıxıb və məhkəmə prosesinin vaxtı dekabrın
28-nə təyin olunub. Düşünürəm ki, ilk məhkəmə prosesi, bizim üçün uğurla nəticələnəcək.
Təbii ki, əgər Əli Kərimli tərəfinin sənədləri qaytarılıbsa və məhkəməyə müraciət
üçün əsas qoyulubsa, deməli bu, bizim üçün də mümkündür. Sevindirici haldır ki,
artıq həm Ədliyyə nazirliyi, həm də məhkəmə səviyyəsində hüquqi təmsilçilik
üçün iki təşkilat var. Artıq AXCP-nin varlığı təsdiq olunub ki, bu, bizim
uğurumuzdur, ən əsası ona görə bunu uğur hesab edirəm ki, təşkilat Əli Kərimlinin
yaxasından canını qurtarıb.
-Yaxın vaxtlarda mitinq
keçirməyi düşünürsüzmü?
-Yox, hələki bu barədə
düşünmürük. Çünki insanları boş- boşuna küçələrə çıxarıb "Azadlıq" və
s. şüarlar səsləndirməklə Azərbaycanda hansısa nəticəyə nail olunacağına
inanmıram. Bu, sadəcə insanlara əziyyət verməkdir. Əgər vətəndaşlardan barış
mitinqi təklifi gələrsə, o zaman biz bunu nəzərdən keçirəcəyik.
-Qurultaydan sonra partiyaya axın varmı?
-Təbii ki, qarşı cəbhədən bizə gələn insanlar da var. O cümlədən
marağımızdadır ki, kənardan gələn insanlar da bizə qoşulsun.
-Siz partiyanı
yaradanda demişdiniz ki, biz radikal müxalifət olmayacayıq, ana müxalifət
istiqamətini götürəcəyik və Azərbaycanda tamlığı təbliğ edəcəyik. Lakin sosial
şəbəkələrdə sizin fikirləriniz paylaşılarkən bir növ radikal fikirlər hiss
olunur. Sizin radikal müxalifətdən fərqiniz nədir?
-Təbii ki, biz ana
müxalifəti təmsil edirik, lakin dünyanın bütün ölkələrində müxalifətin
ritorikası yumşaq ola bilməz. O cümlədən bizim də ritorikamız radikaldır. Sadəcə
faktsız heç kimə qarşı tənqid və təhqirlərə yol vermirik, heç kimi günahkar
adlandırmırıq. Biz çalışırıq ki, etdiyimiz tənqid obyektiv və hüquqi çərçivədən
kənara çıxmasın. Lakin hər bir tənqidin arxasında müəyyən qədər təkliflər yer
alır. Çünki tənqid etmək başqadır, tənqid edib çıxış yolunu göstərmək başqa. Təbii
ki, tənqidlərimizin arxasında müxtəlif təkliflərimiz də olur. Bunların sayı
getdikcə artmaqdadır. Gələn ildən başlayaraq müxtəlif sahələr üzrə
proqramlarımızı da təqdim edəcəyik. Məsələn, deyəcəyik ki, YAP-ın hər hansı bir
sahə üzrə fəaliyyəti yarıtmazdır və biz öz radikal mövqeyimizi ortaya qoyaraq
bunu qəbul etmirik. Biz istəyirik ki, başqa cür olsun və bunun üçün öz
proqramımızı irəli sürəcəyik.
-Sizin sıralarınızda
YAP-ıın uğurlu siyasətini dəstəkləyən insanlar varmı?
-Bilirsiniz, biz heç
vaxt deməmişik ki, YAP-çılar xalqı məhv edən insanlardır, korrupsionerdirlər, Azərbaycan
müstəqilliyini istəmirlər, oğrudurlar və s. Təbii ki, bunlar boğazdan yuxarı
deyilmiş sözlərdir. Mən düşünürəm ki, istər YAP olsun, istərsə də qeyri-təşkilat
olsun, onlar hamısı Azərbaycanı təmsil edən qurumlardır. İqtidarda olanlarla
müxalifətdə olanlar hətta bir-birinə qohumdurlar. O cəhətdən bir neçə nəfərə
görə, insanları tam olaraq sıradan çıxarmaq olmaz. Sadəcə iqtidarın problemi
siyasi sistemin korrupsiyalaşması və oturuşmuş olmamasıdır. Buna görə mən
düşünmürəm ki, YAP Azərbaycan xalqının düşmənidir. Amma YAP-ın apardığı siyasət
həm də iqtisadi problemlərin yaranmasına dəlalət edir.
-Bu siyasi sistemi
sizin addımlarınızla dəyişmək mümkün olacaqmı?
-İlk öncə prezident
siyasi iradə ortaya qoymalıdır. Düşünürəm ki, siyasi iradə olmasa çətin ki, biz
nələrəsə nail ola bilək. Müəyyən işartılar görünür ki, islahatlar vasitəsilə
insanlarla məmurların təmasının aradan qaldırılması müstəvisində müəyyən işlər
var. Son zamanlarda prezidentin imzaladığı sərəncamlar da onu göstərir ki,
insanlarla məmurların arasındakı təmasın aşağı salınmasına çalışılır. Amma bu
tam olaraq problemləri həll etmir. Ölkədə çox ciddi problemlər var. Torpaq
islahatı, insanların ev tikməsi ilə bağlı sənədləşmə çox gərgin vəziyyətdədir.
Məhkəmələr ədalətsiz qərarlar verirlər. Bu yaxınlarda mətbuatda oxudum ki, bir
neçə məhkəmə hakimləri MTN generallarının sifarişləri ilə biznesmenlər haqqında
yalnış qərarlar çıxarırlar. Bax bu siyasi sistemin özünün bəlasıdır. Hər kəsi
öz partiyasına uyğun icra hakimiyyətinə rəhbər təyin edirlər. Dövlətin içərisində
kifayət qədər qeyri-qanunu yolla, o cümlədən iqtidarın razılığı ilə
monopoliyalar yaradılıb. Bütün bunlar ölkədə siyasi sistemin çökməsinə şərait
yaradır.
-Beynəlxalq Təşkilatlar
adətən ölkəyə gələndə müxalifət təmsilçisi kimi Əli Kərimlini görüşlərə dəvət
edirlər. Siz həmin beynəlxalq qurumlarla görüşlərdə iştirakla bağlı nə kimi işlər
görürsünüz?
-Mən deməzdim ki, Əli Kərimlinin
beynəlxalq əlaqələri güclüdür. Əli Kərimlinin görüşlərdə iştirak etməsi onun
uzun illər AXCP-yə rəhbərlik etməsindən irəli gəlir. Biz də hüquq təmsilçisi
kimi fəaliyyətimizi artırırıq və yaxın gələcəkdə getdikcə əlaqələrimiz güclənəcək.
Amma bunlardan əlavə bizim özümüzün müəyyən əlaqələrimiz var. 2016-cı ildə görəcəksiniz
ki, bizim ikitərəfli hansı görüşlərimiz var, hansı müqavilələri imzalayırıq,
hansı beynəlxalq təşkilatlarla əməkdaşlıq edirik, hansı beynəlxalq
koalisiyalara və ya hansı siyasi bloklara üzvlüyümüz var və s. Bunlardan xəbər
tutacaqsınız. Gələn ildən etibarən məlumatları ötürməyə başlayacağıq.