Ayrılıqdan sonrakı təqib
Bəlkə də
aramızda çoxu bunu edir: işini-gücünü atıb, ya da ən azından hər fürsətdə keçmiş
sevgilisini sosial şəbəkələrdə izləyir. Məsələyə romantizm tərəfdən yanaşsaq,
qınamarıq. Sezen Aksusayağı sevgilisinə "get”
desə də "mə” inkar şəkilçisini içində boğub "ayrılığa hazır olmayanlar”, hətta
orqanizmin harasında yerləşdiyi qeyri-müəyyən olan "sarı sim”i də yamanca titrədirlər.
Amma məsələnin acı tərəfi həsrət odunda qovrulan eks-aşiqlərin romantizmində deyil, psixi durumunda imiş. Amerikalı alimlərin
fikrincə, sevgililərin sosial şəbəkədə izlənməsi narkotik asılılıqla bərabər
tutula bilər. Hər fürsətdə eks-sevgilisinin həyatını izləyən yaralı aşiq onun
sevinci, xoşbəxt anları, yeni dostlarına heç də dözümlü yanaşmır. Bundan
qıcıqlanan aşiq depressiv vəziyyətdə hiddətlənə və gözünün tutmuş ani kin
altında cinayət də törədə bilər.
Bu psixoloji təqibin
adı da var: "stalkinq”. Bu ada arzuolunmaz zənglər, hədə-qorxu dolu sms-lər,
virtual tacizlər daxildir. Xüsusən də
sosial şəbəkələrin çoxluğu qəddar aşiqin işini daha da asanlaşdırır: bir neçə şəbəkədə
hərtərəfli izləmə movqeyi qura bilir.
"Ayrılıqdan
sonrakı təqib” adı altında aparılan araşdırmada belə insanlar 2 tipə ayrılıb: passiv
təqibçi, aktiv təqibçi. Passiv təqibçilər, adından göründüyü kimi yalnız qarşı tərəfi izləməklə
gününü göyə sovurur. Özündə mazaxizmin təməlini atır: unutmaq yerinə, sevgilisi ilə virtual nəfəs alır, onsuz davam edən xoşbəxt həyatının qəhrini çəkir. Ritual olaraq davam edən bu təqib,
əlbəttə ki, aşiqin öz başında çatlayır. Psixoloji əziyyət, yerini cismani
ağrılara verir. Orqanizmdə ağciyər, göz, ürək, əsəb xəstəlikləri "əl-ələ verib”
sahibini böyrü üstə yıxır.
Aktiv təqibçilər
isə özlərinə zülm eləməklə yanaşı, qarşı tərəfi də incidirlər. Çox vaxt
qürurunu da nəzərə alan təqibçi öz profilindən deyil, saxta profildən şəbəkəyə
daxil olur, dostluq atır, şərhlər yazır. Bir sözlə, qarşı tərəfin yaxın
virtual çevrəsinə girə bilir. Bütün bunlardan xəbərsiz "qurban” isə yeni həyatının
hər anını şəkillərə, statuslara töküb yaşamına davam edir. Yaxşı məsləhətçi
hesab etdiyi bu "dost”la bir gün real çay süfrəsinə oturduqda isə... köməyinə heç kəs gələ
bilmir. Belə cinayətlərin sayı deyilənə görə, Amarika və Rusiyada hədsizdir. Elə
qərblilər demiş: "Bu dünyada ən qorxulu düşmən, tərk edilmiş, ayrılığa dözməyən
aşiqdir”.
Odur ki, ayrılığın təşəbbüskarı olanlar! Ya yeni həyatınızı məhrəm saxlayın (ən azından "göz dəyər” adı altında qorunun), ya da adam balası kimi ayrılın. Çünki hər aşiq də İbrahim Tatlısəsin arabeski altında gecə-gündüz içib, damarlarını doğramır, canına heyfi gələnlər hirsini qarşı candan çıxır.
Şəfiqə ŞƏFA