Gözəlliyin tələb etdiyi əziyyət
Hündürdaban ayaqqabılar – qadınların ən sevdiyi, eyni
zamanda ən narahat olduğu aksessuarlarındandır. Söz yox ki, hündürdaban
ayaqqabılar gözəldir: qadın ayaqlarını daha biçimli, uzun edir, bədəni daha qamətli,
cazibədar göstərir, yerişi tənzimləyir. Amma əksər qadınlar hündürdaban
ayaqqabılarla bağlı iki dəfə sevinirlər: bir geyinəndə, bir də çıxardanda!
Hündür ayaqqabılar üzərində bir günlük "səyahət”in günün sonunda hansı əziyyətlər verdiyini qadınlar çox yaxşı bilir: dabanların
ağrısı, barmaqların sıxılmış kimi sızıldaması, ayaqda şişkinlik və s. Bəs bu
ağrılardan qısa müddətə necə xilas olmalı?
Əgər iş yerindəsinizsə, masanızın arxasına keçən kimi
kabluklarınızı çıxarın. Ayaq barmaqlarınızı yığıb-açmaqla ağrını nisbətən
azalda bilərsiniz. Şərait imkan verirsə, döşəmə təmizdirsə, ayaqqabısız bir neçə
dəqiqə gəzişin. Barmaq uclarınızda, sonra dabanlar üzərində dayanın. Otaqda
yalnızsınızsa və ya qadın heyətidirsə, bir stul qarşınıza qoyub ayaqlarınızı
uzadın.
Evdə isə ilk növbədə masaj edin: xüsusilə də
barmaqlara və pəncələrə diqqət ayırın. Sonra xalçada uzanıb yarım saat ayaqlarınızı
divanın və ya kreslonun üstünə qoyun. Ən yaxşı üsul vannadır: bir tas isti suya 1 xörək qaşığı
soda töküb qarışdırın, 15 dəqiqə saxladıqdan sonra ayaqları qurulayıb, krem çəkin.
Çobanyastığı və nanə dəmləməsi ilə də ayaq vannası edə bilərsiniz. Su soyuyana
qədər ayaqlarınızı tasda saxlayın.
Bundan başqa, isti və soyuq su kontrastları da yaxşı
təsir göstərir. 5-6 dəfə gah isti, gah soyuq suda ayaqları 2-3 dəqiqə saxlamaq,
ümumilikdə orqanizm üçün çox xeyirlidir. Şəkərli diabet xəstələri və varikoz
damar genişlənməsi olan şəxslərə isə bu prosedur ziyanlıdır.
Buz kubikləri də ayaqları dərhal rahatladır. Bundan
sonra isə spirtlə silib özünün qurumasını gözləyin.