adalet.az header logo
  • Bakı 10°C
  • USD 1.7

son ŞERLƏR

VAHİD ƏLİFOĞLU
35566 | 2011-02-05 06:41
...Bakıya da belə yağır,
   
   Çadıra da, Qarabağa da,
   
   Bu qar.
   
   ...Havalanmış qaçqınlar
   
   Çıxıb çadırlardan
   
   Qaçırlar hara gəldi.
   
   Ağ xalatlıları görmüş
   
   Dəli kimi...
   
   
   
   ***
   
   ...Sən məni bələyə qaytar, ilahi,
   
   Anamı diriltmək mənim
   
   boynuma...
   
   
   
   ***
   
   Görüşməsək yaxşıdı,
   
   Yüz araq,
   
   Bir siqaret ovundurursa
   
   Sənin həsrətini...
   
   
   
   ***
   
   ... Səni tapmaq ümidi
   
   Qatdı başımı,
   
   Qocalmağa imkanım olmadı...
   
   
   
   ***
   
   Qürbət yerin işıqları,
   
   Şüşə sınığına oxşayır.
   
   Baxanda gözlərim qıyılır,
   
   Dabanım göynəyir...
   
   
   
   ***
   
   ... Bu şəhərin nəyi var içində,
   
   Dağılıb üzünə...
   
   ***
   
   Qocalığın üzünə
   
   Eynəksiz baxmaq olmur...
   
   
   
   ***
   
   Keçən günlər,
   
   Keçən günlər-
   
   Ortasına daş atılmış
   
   Göl kimidi...
   
   
   
   ***
   
   Başımda,
   
   Gözlərimi yummağa qoymayan
   
   Ömrümün "qara qutu"su var.
   
   Kimə göstərirsən göstər,
   
   Hara aparırsan apar,
   
   O lentlərdə sənin adın yoxdu...
   
   
   
   ***
   
   Dənizin dibində
   
   Yosunların arasında,
   
   Batmış balıqçının əlləri
   
   Kompas əqrəbləri kimi
   
   Uzanıb sahilə tərəf...
   
   
   
   ***
   
   Tufanlı dənizdə,
   
   Balıqçı qayığı ada deyil.
   
   Özünü asmaq istəyən
   
   Tənha adamın ayaqları altındakı
   
   Sınıq-sınıq kətildi...
   
   
   
   ***
   
   Dağlardan düzə köçənlər,
   
   Minarədən enimş azançılarda,
   
   bəlkə də...
   
   
   
   ***
   
   Anam yuxuma girir,
   
   92-də torpağa tapşırdığım anam,
   
   Qırmızı paltarda.
   
   Yəqin evimizi yandırıblar...
   
   
   
   ***
   
   Köçəcəyik Haramıya,
   
   Daş evlərə.
   
   Əkdiyimiz ağaclar qalacaq.
   
   Bircə qızlarımın on il yüyürləndiyi
   
   Yüyürüyün kəndirini açıb
   
   aparacağam...
   
   
   
   ***
   
   Mədəniyyət nazirimiz söz verdi ki,
   
   Bir maşın nağara göndərəcək...
   
   
   
   ***
   
   Bakıda, şadlıq evində
   
   Müğənni Qarabağdan oxudu
   
   Bəyin əmisi qalxdı ayağa:
   
   - Qanımızı qaraltma,
   
   ayrı şey oxu - dedi...
   
   
   
   ***
   
   Təzə yurddan kəndimiz görünür,
   
   İyirmi beş yaşımda çəkilmiş
   
   Pasportdakı şəklim kimi...
   
   
   
   ***
   
   Məmləkətimizin
   
   Hər qarışı vətəndi.
   
   Amma hər qarışı Qarabağ deyil.
   
   
   
   ***
   
   Bizim udacağımız hava,
   
   İçəcəyimiz su Qarabağda qaldı.
   
   Bu on ildə nə odumuz söndü,
   
   Nə havamız çatdı...
   
   
   
   ***
   
   Adına cəhənnəm tikilmiş millətə,
   
   Bu dünyada cənnət bağışladıq.
   
   
   
   ***
   
   Mənim ailəmin namusu mənimdi,
   
   Topağın namusu
   
   Təkcə mənim adıma yazılmır.

TƏQVİM / ARXİV