Feminizmin rəngi tapıldı
İndiyə qədər
dəb nələri yaratmadı, nə dəlilikləri, çirkinlikləri, gözəllikləri sərgiləmədi.
Cırıq paltarları, əcaib saç düzümlərini, çılpaqlığı, zidd rəngləri yüksək moda
kimi təqdim etdilər. Bu çılğınlıqlara mühafizəkarlar nə qədər etiraz etsələr də moda diktəsinin qarşısını heç kim ala bilmədi, heç bundan sonra alınması da mümkün olan deyil. Amma bu son dəb trendi daha təəccüblü oldu. Belə ki, bundan sonra qocalıqdan qorxan
qadınlar özlərini qocaya bənzədəcəklər. Yəni bu il boz, ağarmış saçlar dəbə minib.
İndiyə qədər başında bir ağ tük görünəndə Məşədi İbad kimi dartıb çıxardan
qadınlar indi saçlarının qara hissələrini də ağardacaqlar. Ağardacaqlar deyəndə ki, artıq başlayıblar: məşhur
xanımlar yeni "qocalmış” imiclərini İnstagramda sərgiləyirlər. Ledi Qaqa,
Rihanna, Nikol Riçi və başqalarının sosial şəbəkələrdəki gümüşü-ağ saçları onların fanatlarını
da ilhama gətirib. Artıq ABŞ-da gözəllik salonları qocalmaq istəyən cavan qadınların "ata ocağı"na çevrilib. Sosial şəbəkələrdə hətta "Nənələrin saçları” adlı həştəq
də yaradılıb.
Stilistlər
özləri bu rəngin belə sıçrayışla populyarlaşmasına məəttəl qalıblar. Düzü, bu
modelyerlərə yenilik baxımından sərf eləsə də, sosioloqları və mühafizəkarları
narahat edib. Qafalardakı böyük "Niyə” sualına isə müxtəlif cavablar verilir. Bəziləri
qadınların bununla saç boyamağa qarşı çıxdıqlarını, qocalmanın təbii hadisə
kimi qəbul edilib bir gözəllik kimi təbliğ olunmasına çalışdıqlarını deyirlər. İllərdən bəri amansız düşmənləri - qocalıq qarşısında yenilməzliklərini göstərirlər. Bir qrup ekspertlər isə bunu feminizm asi çaları kimi təqdim edirlər. Əslində
bu elə birinci səbəblə sıx əlaqədardır. Buna misal olaraq, Parisdə keçirilmiş
son moda həftəsində Jan Pol Qotye kolleksiyasının nümayişində yaşlı, ağsaçlı
xanımların podiuma çıxarılmasını göstərmək olar. Bu nə deməkdir? Feminizmin
ağbirçəkləri meydan sulayır? Ən azından nümunə olur - "Qadınların sərvəti cavanlığıdır"- deyən kişilərə tutarlı zırbı endirmək üçün. Dünyanın onsuz da
matriarxatlığa istiqamətləndiyi aydın görünür, amma bu işi sürətləndirmək kimlərə
lazımdır?! Qadın hərəkatının nümayəndələri, şüarları, tələbləri artıq ötən əsrdən
masaya qoyulub, bir qalırdı rəngini bəlirləmək, bu da yarandı. "Ağ hərəkat” qar
uçqunu kimi sürətlə yuvarlanaraq qarşısına çıxan müxtəlif rəngdən, irqdən olan
qadınları və "yeni qadınları” – transları ağuşuna alır. Amma bu uçqunda
boğulmaq, donmaq da var axı! Olsun, dəyişən dünyada daş heykəlləri buz heykəllərin əvəzləməsi
də təəccüblü görünməz.