Gənclər “Vətəni Sevək!” deyir
"Gənclərin Sosial Tərəfdaşlığı Mərkəzi” İctimai Birliyi fevralın 1-dən Azərbaycan Respublikasının Prezidenti yanında Gənclər Fondunun maliyyə dəstəyi ilə "Vətəni Sevək” adlı layihəyə start verib.
Cari ilin martın 5-dən Sabirabad rayonundakı M. Ə. Sabir adına 1
saylı orta məktəbdə layihə çərçivəsində ilk təlim keçirilib. Ümumiyyətlə isə, bu
günədək 3 təlim baş tutub. Adıçəkilən məktəbdən əlavə, təlim və tədbirlər
rayondakı 2 və 4 saylı orta məktəblərdə də keçirilib.
İctimai Birliyin mətbuat xidmətindən daxil olan məlumata görə, Saatlı
rayonunda isə təlim və tədbirlərə martın 6-da Heydər Əliyev Mərkəzində start
verilib. Rayonda ümumilikdə 3 təlim keçirilib ki, bunun 2-si Heydər Əliyev Mərkəzində,
biri isə V. Əsgərov adına 4 saylı tam orta məktəbdə baş tutub.
Layihə rəhbəri Vüsal Əhmədovun bildirdiyinə görə, keçirilən təlimlərdə
layihə haqqında iştirakçılara məlumat verilib, layihənin əhəmiyyətindən
danışılıb. Bildirilib ki, məqsəd Azərbaycanın tarixini, onun şərəfli səhifələrini,
ağır dövrlərini gənclər arasında təbliğ etmək, onları Vətəni sevməyə
ruhlandırmaqdır. Eyni zamanda, vətənpərvərlik, gənclərin vətənpərvərlik ruhunda
tərbiyəsinin önəmli olması vurğulanıb, dövlətçilik və onun qorunmasının
vacibliyi dilə gətirilib.
Azərbaycan Respublikasının Prezidenti İlham
Əliyevin başçılığı ilə ölkəmizdə həyata keçirilən gənclər siyasəti, gənclərə
göstərilən qayğı və diqqət keçirilən təlimlərin əsas mövzularından olub.
Qeyd edək ki, Sabirabad rayonunda keçirilən tədbirlərdə 84, Saatlı
rayonunda keçirilən tədbirlərdə isə 75 nəfər iştirak edib.
Onu da bildirək ki, hər iki rayonun Gənclər və İdman idarələri layihənin
keçirilməsinə dəstək olur.
Layihənin icrası davam edir.