Frenk Abiqneyli tanıyırsınızmı?.. O haradan başlayıb, nələrdən keçib, harada dayanıb?..

(Əvvəli qəzetin 3 mart sayında)

"Kitti Korbett doğrudan da xeyirxah qarı çıxdı. Pit məni təqdim edəndən sonra ona vəziyyətim barədə eyni şeyləri söylədim. Aviakompaniyadakı işimin mənim üçün həyati-vacib məsələ olduğunu deməyi də unutmadım. Və Korbett bir qədər düşündükdən sonra telefonu götürüb bir neçə yerə zəng vurdu, ispanca nələrsə danışdı, ardınca daha bir yerə telefon açaraq:

Müvəqqəti pasportum üçün elə oradaca şəkilimi çəkdirib verdim və bir neçə saatdan sonra qaydasında olan sənədlərimlə Londona uçan təyyarədəydim. Özü də bura gəldiyimdən daha çox varlıydım..."

        "PİLOT" "UNİVERSİTET MÜƏLLİMİNƏ", "HƏKİM"Ə ÇEVRİLDİ...

Frenk Abiqneyl həyatının həmin dövründə artıq hiss etmişdi ki, uzun müddət "pilot" kimi fəaliyyət göstərməklə çox təhlükəli fazaya daxil olub. Çünki onu belə tanıyanların sırası çox genişləınmişdi. Tezliklə "sənətini" dəyişməliydi. Briqma Yanq Universiteti və orada çalışan insanlar haqqında ətraflı məlumat topladıqdan sonra özü üçün Frenk Adams adına Kolumbiya Universitetinin diplomunu düzəldərək orada çalışmağa başladı.

Bioqrafların araşdırmalarından aydın olur ki, Frenk Abiqneylin çox böyük ustalıqla hazırladığı sənədlərin saxta olduğunu bilmək hədsiz dərəcədə çətin idi. Hər hansı bir sənədin, yaxud bank çekinin həqiqi olmadığını yalnız ciddi yoxlamalardan sonra müəyyən etmək mümkün idi ki, super-peşəkar fırıldaqçının davranışları üzə çıxa biləcək kiçik ehtimalı da heçə endirirdi.

Universitetdə müəllim kimi tam bir smestr "sosialogiya" intizamından "mühazirələr" oxuyan Abiqneyl buradan da getmək qərarına gəldi. Çünki daha "cəzbedici" bir peşəni hədəfləmişdi: həkim-pediatr. Bu sahəyə aid saxta sənədlər düzəltdikdən sonra özünü Corcia ştatındakı xəstəxanalardan birinin Frenk Konners adlı həkimi kimi təqdim edərək "fəaliyyətə" başladı. Tam səkkiz aylıq "çalışmalar"dan sonra yenidən "ixtisasını" dəyişmək istədi.

                                                      PROKURORLUĞA?..

Bioqraflar qeyd edirlər ki, Frenk Abiqneyl risqli işlər görməkdən, mürəkkəb situasiyalardan çıxıb pul əldə etməkdən xüsusi zövq alırmış. Bu məşğuliyyət onu o qədər özünə cəlb etmişdi ki, artıq hər yerdə axtarıldığına baxmayaraq onun üçün daha təhlükəli ola biləcək yerlərə də əl uzatmağa başlamışdı. Bəlkə də heç bir super-fırıldaqçının risq edə bilməyəcəyi bir sahəyə girişmişdi. Belə ki, növbəti qadın dostlarının birinə Harvard Universitetinin məzunu olduğunu və özünə layiq yaxşı bir yerdə iş axtardığını söyləmişdi. Və ardı onun hesabladığı kimi də getmişdi. Frenk o xanımın vasitəsiylə hörmətli bir hüquqşünasla tanış olmuşdu ki, həmin hüquqşünas da Frenki vakant yeri tutmaq üçün yoxlamadan keçməyə dəvət eləmişdi.

Maraqlıdır, cəmi iki aylıq hazırlıqdan sonra iki dəfə sınaqdan keçə bilməsə də nəhayət növbəti təşəbbüsdə istəyini əldə edən Frenk Luiziana ştatının baş prokurorluğunda işə düzəldi. Əlbəttə, həm bu cəsarətə, həm bu bacarığa, həm də bu şansa görə Frenk Abiqneylə heyrətlənməmək mümkün deyil. Durmadan qanunları pozan, sürəkli cinayət törədən, saxtakarlıqla böyük pulları mənimsəyən qaranlıq dünyanın hansı nümayəndəsi risq alıb prokurorluğa qədər əl uzadardı?..

Lakin o bunu da etdi. O da düzdü ki, Frenk Abiqneyl prokurorluqda uzun müddət çalışmadı. Bir ili tamam olmadan öz xahişiylə işdən getdi. Harvard Universitetinin daha bir məzunun onlarıın yanında işə düzəlməsi əslində Frenkin gedişini sürətləndirmişdi. Çünki hər an yalanları ortaya çıxa bilərdi.

                     USTA FIRILDAQÇININ HƏBSİ VƏ FTB İLƏ ANLAŞMA

Amma görünür kim olursa-olsun, peşəkarlığı hansı səviyyəyə çatırsa-çatsın qüsursuz, ideal kimsə yoxdur. Belə ki, günlərin birində izinə düşən saysız-hesabsız əməliyyatçıların əlindən qurtula bilmədi. Yaxalanaraq həbs edildi. Bioqrafların yazdığına görə, Frenk Abiqneyl Fransada tutulanda onu axtaran düz 12 ölkənin hüquq-mühafizə orqanları rəsmi şəkildə usta fırıldaqçını Parisdən tələb etdilər ki, cəzasını özləri versinlər. Lakin Fransız məhkəməsi iki gün ərzində işə baxaraq Frenk Abiqneyli bir il müddətinə həbsə məhkum etdi.

Qəribə də olsa bir qədər sonra onun cəzası niyəsə 6 aya endirildi. Və bunun ardınca da o, Fransadan İsveçə ekstradisiya olundu. Lakin bu son deyildi. İtaliya məhkəməsində də onun fırıldaqlarının növbəti araşdırılmasına başlanıldı. Amma bütün bunlara baxmayaraq bu məşhur fırıldaqçı ABŞ-a gətirildi. 1971-ci ilin aprelində Virciniya ştatının məhkəməsi Frenki 12 illik müddətinə azadlıqdan məhrum etdi. Amma...
Amma bundan sonra çox nadir hadisələrdən biri baş verdi. Frenk Abiqneyl ona kəsilmiş cəzanın illərini "yola verdiyi" vaxt Amerika Federal Təhqiqatlar Bürosu (FTB - "FBR") onunla danışıqlara girib gizli əməkdaşlıq təklifində bulundu. Təklif belə idi: Frenk Abiqneyl ilk növbədə əməllərindən əl çəkir və Büroyla əməkdaşlığa razı olur, qarşılığında hökumət də onun cəzasını yüngülləşdirir. Onun üçün bundan yaxşı nə ola bilərdi? Həyatı türmədə çürütməyin nə mənası vardı ki? Razılaşma alındı. Artıq cəzasının dörd ilini başa vurmuş Frenk azadlığa buraxıldı.

Təbii ki, həbsdən sonra onun üçün normal bir iş tapmaq müşkül bir məsələyə çevrildi. Frenk öz keçmişini nə qədər gizlətməyə çalışsa da, onu işə götürmək istəyənlər öyrəndikləri məlumatlardan sonra əməkdaşlıqdan boyun qaçırırdılar. Amma Abiqneyl çox orijinal bir çıxış yolu tapdı. O, bank kontoruna sənədlərdə, ödəmələrdə, hesablarda təhlükəsizliyin təmin olunması üçün öz xidmətlərini təklif etdi. Onun planlarını nəzərdən keçirən rəhbərlik məmnuniyyətlə razılaşdı. Və beləliklə, Frenk Abiqneyl bir zamanlar hər çür fırıldaqlarla başlarına oyun açdığı bank sisteminin təhlükəsiliyini leqal şəkildə qorumaqla məşğul olmağa başladı.

Əlbəttə, FTB də onun məsləhətlərindən yararlanmağı davam etdirirdi. Öz işlərinin peşəkarı olan Abiqneyl göstərdiyi xidmətlərinə görə, qanuni şəkildə yüksək qazanc əldə etməyə başladı.

                                           İSTEDAD HƏR YERDƏ İSTEDADDI

Məhz belə uğurlu çalışmaları elə bir həddə gəlib çatdı ki, Frenkin Oklahomada, Talesdə qurduğu "Abiqneyle & Associates" Agentliyi beynəlxalq nüfuza malik nəhəng maliyyə qurumlarının apardığı əməliyyatlardakı təhlükəsizlik məsələlərinin konsultantına çevrildi. Və qeyd edim ki, Frenkin Agentliyi hazırda 14. 000 kompaniyanı saxtakarlıqdan, fırıldaq əməliyyatlardan qorumaq işini üzərinə götürüb. Bundan başqa, Frenk Abiqneyl FTB-nin ixtisas Akademiyasında mühazirələr də oxuyur.