Yazıçılar üçün bir gün - Sorğu
Dünyada belə bir qanunauyğunluq var ki, müxtəlif peşələr üçün müəyyən günlər ayrılır. Bəzən formal xarakter daşıyan belə peşə bayramları əhəmiyyətsiz hesab edilsə də, əslində hər bir sahə üçün nəzərdə tutulan xüsüsi günlər həvəsləndirmə, motivasiya baxımından çox vacibdir. Həmçinin həmin peşənin təbliğatı, diqqətlərin bu sahəyə ayrılması üçün bir vasitədir. Yazıçı peşəsinə diqqət də elə ədəbiyyata diqqət deməkdir. Dünyanın mənəviyyatdan çox maddiyata üstünlük verdiyi bir dönəmdə ədəbiyyatın təbliği bir az da özünəqayıdışdır.
Bir günlük
xatırlatmanın nə dərəcədə əhəmiyyətli ola biləcəyi qafalarda sual işarəsi
yaratsa da, 365 gündən birini həmişə başqalarından yazanlara həsr etmək, lazımdır,
hətta vacibdir (şəxsən mən belə düşünürəm – qələm adamı olaraq). Milli və
dünya ədəbiyyatının yaranmasında, geniş kütləyə çatdırılmasında, toplumun mədəni,
mənəvi, psixoloji düşüncəsinin formalaşmasında böyük xidmətləri olan yazarların
bir günün qəhrəmanı olmağa haqqı var!
Gələk bu günün
tarixinə - 1921-ci ildə PEN-klub (poets
(şair), essayists (oçerkçi) və novelists (roman müəllifi) qeyd olunmağa
başlayıb. 1923-cü ildə isə Londonda PEN klubu ilk beynəlxalq konqresi
keçirilib. 1986-cı il yanvarın 12-dən 18-dək artıq PEN-klubun sayca 48-ci beynəlxalq
konqresi baş tutub. Məhz həmin konqresin iştirakçıları mart ayının 3-ün
«Yazıçının Ümumdünya Sülh Günü» elan edilməsi barədə qərar qəbul ediblər. Amma sonralar
bu bayram sadəcə, «Yazıçılar
günü» adlandırılmağa başlayıb.
Bəs görəsən, Azərbaycan ədibləri üçün bu
peşə bayramının əhəmiyyəti nədir? Adalet.az olaraq bəzi qələm sahiblərinin
fikirlərini öyrəndik:
"Diqqət, qayğı, təbrik və mükafata hər kəs kimi yazıçının da ehtiyacı var"
Azərbaycan Yazıçılar Birliyinin mətbuat
xidmətinin rəhbəri, şair Xəyal Rza - Yazıçı üçün xüsusi günün, bayramın çox
böyük əhəmiyyəti olduğunu zənn etmirəm. Amma təbii ki, bu kimi məqamlar
yazıçının, şairin həyatında, yaradıcılığında stimul rolunu oynaya bilir.
Diqqət, qayğı, təbrik, mükafat və s. amillər var ki, buna hər kəsin ehtiyacı
var. Eləcə də yazıçının. Bilirsiniz ki,
Gənc Şairlər Birliyi olaraq biz də hər il iyun ayının 5-i tarıxini - Mikayıl
Müşviqin doğum gününü Şairlər Günü elan etmişik. Və artıq 5 ildən çoxdur ki,
hər il müxtəlif ölkələrdən gələn tanınmış qonaqlarımızla bu günü təntənə ilə
qeyd edirik. Müsbət reaksiyalardan görürük ki, bu gün necə əhəmiyyətli bir günə
çevrilməkdədir. Elə buna görə də icazə verin yazıçıların da, şairlərin də
təbrik alacaqları bir günləri olsun.
"Yazıçılar onsuz da, bu gün oldu-olmadı sözdə həmrəydirlər"
Ədəbi tənqidçi, tərcüməçi Cavanşir
Yusifli - Yazıçılar gününə və ümumən yazıçıların bir yerdə olmasına ehtiyac
var. Əgər bunun anlamı və mənası həmrəylikdirsə, şübhəsiz, onların bir yerdə
olması indi dünyanı başına götürən neqativ hallara qarşı söz demək, bu sözü
vahid iradənin ifadəsi kimi demək ehtiyacını doğurur. Ancaq yazıçılar onsuz da,
bu gün oldu-olmadı sözdə həmrəydirlər. "Yazıçı günü" sözünün mənasını
mən belə başa düşürəm və bu mənada yazıçının şəri müdafiə etməsini, bu bəs
deyilmiş kimi, ona qatılmağı dünyanın bəlkə də, ən çəkilməz dərdlərindəndir. XX
və XXI əsrlərdə insanlar, xüsusən də yazıçılar nahaq söz qarşısında susmağın min
üsulunu kəşf ediblər. Dünyada ateist olduğuna görə, başqa səbəblərə görə günün
günorta vaxtı qətlə yetirilən yazıçılar var. Yazıçının kimliyi və sözü əsas
məsələdir. Sülh (Nobel) mükafatı verilən prezidentlər, dövlət başçıları var,
insan qırmaqla məşğuldurlar. Bu qəbildən o qədər fakt sadalamaq olar ki,
nəticədə və bunların müqabilində yazıçının çox zəif olması anlaşılandır. Hər
halda sözü demək və həqiqət bildiyini müdafiə
etmək əsas məsələdir. Bizdə qrupbaz
(devizləri: mən baş, sən ayaq!), başqalarına münasibətdə terrorla məşğul olan
yazıçılar var, bax, bu da bir problemdir.
Bir sözlə, məsələ çox mürəkkəbdir. Əlac nəyədir? "Yazıçı",
"şair" sözünün, anlamının içindəki sadə informasiya düzgün başa
düşülməlidir. Məlum fikirdir: şeir bu dünyanın meydanlarından qələbə marşı ilə
keçməyəcək, nasir əlində bayraq hansısa paraddan keçməyəcək, bu, kosmik əhvalatdır, ruh məsələsidir.
"Yazıçılar günü qeyri-qələm adamlarının diqqətini qələm adamlarına cəlb etmək üçündür"
Yazıçı-tərcüməçi, filologiya elmləri namizədi Məti
Osmanoğlu - Həmkarların həmrəyliyinə, bu həmrəyliyi yaradan tədbirlərə həmişə
ehtiyac var. Təbii ki, bundan ədəbiyyat üçün hər hansı birbaşa əhəmiyyət,
fayda, mənffət gözləmək sadəlövhlük olardı.
Dünya Yazıçılar gününü yaradıcı insanlar arasında həmrəylik yaratmaq
baxımından əhəmiyyətli hesab edirəm. Amma bu, qələm adamlarının yığışıb bayram
qeyd etməsi üçün deyil, dünyanın və qeyri-qələm adamlarının diqqətini qələm
adamlarına cəlb etmək üçün bir
vasitədir. Məncə, bundan ədəbi təbliğat kimi istifadə etmək mümkündür. Yəni
müxtəlif ədəbi mükafatların verilməsi, kitabların təqdimatı və s. üçün istifadə
etmək olar. Dünya Yazıçılar gününü təsis edən Beynəlxalq Pen Klubun başlıca
missiyası isə dünyada söz və informasiya mübadiləsi azadlığı prinsiplərinin
qorunmasıdır.
"Bu xüsusi gün yazıçı və ya şair olduğunu qələm adamının özünə bir daha xatırladır"
Şairə Həyat Şəmi - Bu cür tarixi günlərin
olması ehtiyacdan yaranmır ki... Sadəcə bir tarixi qanunauyğunluqdur. Əgər bu
və ya başqa bir müəyyən gün yaranıbsa tarixən, onu qeyd etmək də zərurətdən
doğur. Yazıçılar Günümüz mübarək! Bu gün elə qələm adamları üçündür. Yazıçı və
ya şair olduğunu bir daha özünə xatırladır. maddi tərəfi olmasa da, mənəvi zövqü var bu bayramın... Qələm adamı
olaraq, yığışıb qeyd etməsək də, tədbirlərlə eyni günə düşərsə xatırlanır.
Şəfiqə Şəfa