Nizami Gəncəvi irsi müzakirədə
Nizami Gəncəvi Beynəlxalq Mərkəzi İdarə Heyətinin növbəti toplantısı keçirilib. "Qafqazinfo”nun verdiyi xəbərə görə, İtaliyanın Florensiya şəhərində keçirilən VIII toplantıda Mərkəzin həmsədrləri Latviyanın sabiq Prezidenti Vayra Vike-Frayberqa və İsgəndəriyyə Kitabxanasının direktoru İsmail Serageldin, o cümlədən Finlandiyanın sabiq dövlət başçısı Tarya Halonen və Serbiyanın eks-prezidenti Boris Tadiç iştirak edib.
İclasda Nizami Gəncəvi Beynəlxalq Mərkəzinin hesabatı dinlənilib, təşkilatın 2015-ci il üçün nəzərdə tutulan büdcəsi, N.Gəncəvi irsinin araşdırılması, "Xəmsə”nin xarici dillərdə nəşri məsələləri, 2015-ci ilin aprel ayında keçiriləcək III Qlobal Müştərək Cəmiyyətlər Forumu müzakirə edilib.
Qeyd edək ki, 2012-ci ildə təsis olunmuş Mərkəzin əsas məqsədi Azərbaycan elm və mədəniyyətinin görkəmli nümayəndəsi, dahi şair, mütəfəkkir Nizami Gəncəvi irsinin araşdırılması və onun dünyada təbliğ olunmasıdır.