Türk xalqlarının gənc şair yazarları Bakıda toplaşacaqlar
Noyabrın 27-30-u bir sıra türk xalqlarının gənc şair
və araşdırmaçı-yazarları Bakıda görüşəcək. Dünya Gənc Türk Yazarlar
Birliyindən (DGTB) Adalet.az-a verilən məlumata
görə, qurumun təşkilatçılığı
və Gənclər və İdman Nazirliyinin maliyyə dəstəyi ilə
baş tutan tədbirdə Türkiyə, Qazaxıstan, Qırğızıstan, Özbəkistan,
Moldova (Qaqauz), Tatarıstan, İraq (Kərkük) kimi ölkə,
topluluq və şəhərlərdən müxtəlif türk xalqlarını təmsil edən istedadlı gənc şairlər,
perspektivli araşdırmaçı-yazarlar iştirak edəcəklər.
Məqsəd türk coğrafiyasını əhatə edən gənc
yazar birlikləri arasında məsləhət mühitinin yaradılması, habelə Azərbaycanın gənc
qələm sahiblərinin digər türk xalqlarından olan həmyaşıdları ilə fikir mübadiləsi
aparmasına, gələcəkdə də ədəbi əməkdaşlığın gücləndirilməsinə xidmət edir.
Gələcəkdə DGTYB-nin təşkilat mandatına
(missiyasına) uyğun nəşrin işıq üzü görməsi də nəzərdə tutulub.
Səfər çərçivəsində gənc türk yazarları Şəhidlər
Xiyabanı və Fəxri Xiyabanı ziyarət edəcək, tanınmış yazıçılarla görüşəcək, müxtəlif
ədəbi qurumlarla, bir sıra Azərbaycan yazarlarının ev muzeyləri ilə tanış
olacaqlar. Tədbir çərçivəsində türk dünyası ədəbiyyat aləmində baş verən ədəbi
proseslər, gənc nəslin ədəbiyyatda rolu və qardaş xalqların ədəbiyyatının
tanıdılması və gələcəkdə əməkdaşlıqlar
istiqamətində müzakirələr aparılacaq, çıxışlar, təkliflər dinləniləcək və
"Yekun Bildiriş” qəbul ediləcək.
Sonda bir neçə ziyalıya "Türk Dünyasına Xidmət
Ödül”ünün təqdimat edilməsi nəzərdə tutulub.
Noyabrın 29-da "Türk Dünyası Şeir
Axşamı”nın keçirilməsi də planlaşdırılır.