İsmayıllı meşələrindəki yanğın söndürülüb
İsmayıllı meşələrində bir neçə gün davam
edən yanğınlar yalnız bu gün, saat 19 radələrində söndürülüb. Adalet.az Ekologiya
və Təbii Sərvətlər Nazirliyinə istinadən məlumat verir ki, İsmayıllı Meşə
Mühafizəsi və Bərpası Müəssisəsinin Talıstan meşəbəyliyinin 2 saylı dolayının
yüksək dağlıq sahəsində baş vermiş yanğın Ekologiya və Təbii Sərvətlər və
Fövqəladə Hallar nazirliklərinin əməkdaşlarının ciddi səyləri nəticəsində
söndürülüb.
Qeyd edək ki, yüksək dağlıq ərazidə
bir-birindən uzaq məsafələrdə yerləşdiyindən və küləklə müşayiət olunduğundan
yanğının söndürülməsi xeyli çətinlik yaratmışdı. Eyni zamanda, yanğının baş
verdiyi ərazi yüksək dağ massivində, yəni dəniz səviyyəsindən yüksəklikdə
yerləşdiyindən yanğınsöndürən maşınların əraziyə cəlb edilməsində problemlər
yaranmışdı.
Buna görə də yanğının qarşısının
alınmasında əsasən əl əməyindən və helikopterlərin köməyindən istifadə edilib. Həmçinin
yaxın dağ çaylarından əl əməyi ilə su daşınıb.
Ümumilikdə bir-birindən aralı məsafələrdə
yerləşən kiçik sahələrdə baş vermiş yanğın közərtilər də daxil olmaqla 20
hektara yaxın ərazini əhatə edib. Yanğın nəticəsində 4 hektara yaxın quru ot və
kol örtüyünə ziyan dəyib.
Hazırda dəymiş ziyanın həcminin müəyyən
olunması məqsədilə araşdırma aparılır.