Yer Planetini UNO-larla nə bağlayır?!
Azərbaycan
niyə UNO-ların "xoşuna gəlir”?!
Tarixin bütün zamanlarında insan oğlunu düşündürən
və narahat edən yadplanetlilər mövzusu həmişə öz aktuallığı ilə diqqət mərkəzində
olub. Azərbaycan da yadplanetlilərin "diqqət”indən
kənarda qalmayıb. Ölkənin müxtəlif bölgələrində dəfələrlə Uçan Naməlum
Obyektlərin (UNO) görünməsinə dair şahid ifadələri və ya faktlar qeydə alınıb. Elə
bu yaxınlarda - avqustun 24-də, axşam saatlarında Hövsan
qəsəbəsində uçan obyekt görülmüşdü. Şahid ifadələrinə görə səmadakı obyekt
sahilə sürətlə yaxınlaşıb, təxminən 1 dəqiqə səmada "vurnuxub", sonra da yoxa çıxıb.
Bundan başqa Sumqayıtda, İmişlidə, İsmayıllıda naməlum
obyektlərin görünməsi ilə bağlı faklar ortaya çıxıb.
UNO-larla ən çox maraqlanan ruslardır
Şimal qonşumuz qədər UNO-larla maraqlanan ikinci
ölkə çətin ki, tapıla. Hələ 1996-ci ildə yadplanetlilərə məxsus uçan obyektin Rusiyada
meşəlik sahədə qəzaya uğrayandan sonrakı görüntüləri yayılmışdı. Bu
hadisədən 18 il sonra Rusiya yenidən dünyaya şok görüntülər təqdim edib.
Belə ki, yadplanetlilər barədə hər
kəsin yalnız təsəvvürü olduğu halda, ruslar gerçək görüntüləri təqdim edib.
Görüntülərin nə vaxt və haradan əldə olunduğu gizli saxlanılır.
Görüntülərdə əks olunan yadplanetlinin boyu 132 sm-dir. Xarici görünüşcə insana bənzərliyi olsa da, boynu çox qısa, gözləri yumrudur. Baş nahiyyəsində saç yoxdur. Burun kiçik bir dəlikdən ibarətdir. Yadplanetlinin ağzı kiçik və yumşaqdır. İki qulağı var. Dərisi qırmızı-qəhvəyi rəngdə, büzüşmüş haldadır. Bütün bədəni incə mavi kapilyarlarla örtülüb.
Görüntülərdə yadplanetlinin üzərində olan və elmə məlum olmayan maddədən ibarət geyim yanmış formadadır.
Alimlər yadplanetlinin ölüm səbəbini araşdırarkən belə qənaətə gəliblər ki, onun ölümünə səbəb UNO-nun partlaması və yaxud yer kürəsinin havasına alışmamasıdır. Alimlər yadplanetlinin daha isti planetdən gəldiyi qənaətindədirlər.
Rusiyanın əksər teleproqramları (xüsusilə son
zamanlar) bu sahəyə yönəlib. Sensasion fikirlərlə beyinləri aydınlatmaq əvəzinə
daha da dumanlandıran bu proqramlarda şokedici açıqlamalar verilir, hətta bilim
adamlarının dili ilə. Belə ki, rus ufoloqları bir çoxumuzun sevimli ev heyvanı
olan pişiklərin başqa planetlərin xəfiyyəsi olduğunu iddia edirlər. Doğrusu,
pişiklərin fövqəltəbii bacarığa, duyuma malik olduğu faktı yeni olmasa da, hər
halda bu qədərini "həzm etmək” elə də asan deyil. Rus ufoloqları iddia edirlər
ki, pişiyin gözləri bu dünyaya qoyulmuş "kamera”dır. Yad planetlərdə onun gözləri
vasitəsilə bu dünyada baş verənləri izləyirlər. Hətta 2002-ci ildə rus mütəxəssisləri
radiodalğa vasitəsilə başqa planetdən pişik miyoltusu eşitdiklərini
açıqlamışdılar.
Maraqlıdır ki, müxtəlif sivilizasiyalarda pişik
kultu həmişə mövcud olub, antik mədəniyyətlərdə pişiyə sitayiş olunub. Misir
ehramlarında, hind eposlarında pişiklə bağlı müəmmalı şəkillər, inanclar mövcud
olub. Bioloqlar bu günə qədər də bu sualın cavabını tapa bilmirlər: pişiklər
istiqamətləri necə belə dəqiq müəyyən edirlər? Məsələ burasındadır ki, pişikləri
hansı tərəfdə azdırırsan azdır (hətta kilometrlərlə uzaqda olsa belə!) yenə də
yaşadığı ünvanı asanlıqla tapa bilirlər.
Yadplanetlilərin Yer üzündəki daha bir şpionu da göbələklərdir. Rus və yapon alimləri uzun araşdırrnalardan sonra belə nəticəyə gəliblər ki, göbələklər şüurludurlar! Alimlər daha cəsarətli bəyanatlar verərək bildiriblər ki, qidadan tutmuş, bədəndə, torpaqda – hər yerdə mövcud olan göbələklər dünyada şəbəkə şəklində mövcud olaraq məlumat toplayıb özlərində saxlaya bilir və yadplanetlilər də Yer üzünə "təşrif buyurarkən” lazımi informasiyaları onlardan əldə edə bilirlər.
Dahi alimlər yadplanetlilərdimi?
Çağdaş dünya əhalisinin 20 faizi yadplanetlilərin
mövcud olduğuna inanır. Reyter agentliyi bu barədə 22 ölkədə 23 min insan
arasında sorğu aparıb. Nəticələrə görə, Hindistan və Çində əhalinin 40 faizi
yadplanetlilərin insan qiyafəsində aralarında olduğuna inandığını deyib. Bu
iddiaya ən az inanan isə Belçika, İsveç və Hollandiyada yaşayanlardır. Adı çəkilən
ölkələrdə cəmi 8 faiz gəlmələrə inanan var. Qeyd edək ki, gəlmələrin olduğuna və
onların insanların arasında yaşadığına inananların əksəriyyəti 35 yaşdan aşağı
olanlardır. Xəyalpərəst, mistik mövqeli, eyni zamanda belə sirli məsələləri
özünün gündəlik həyat tərzinə çevirənlər onların varlığına daha çox inanırlar. Hətta
son zamanlar bu günə qədər dahi alimlər kimi tanıdığımız bir sıra şəxsiyyətlərin
(xüsusilə yaşadığı zamana görə xeyli irəlini görmüş alimlər) yadplanetlilər
olduğu iddia edilir. Bunların arasında ilk yeri Leonardo da Vinçi (1452-1519) tutur.
Buna səbəb özündə bir çox istedadları birləşdirmiş dühanın hələ 6 əsr bundan
qabaq bir sıra müasir icadları etməsini əsas gətirirlər. Əlbəttə o dövrün
insanı üçün velosiped, paraşüt, uçan aparatlar, müxtəlif hərbi silahlar, linza,
avtomobil çertyoju, projektor, robot və.s. kimi kəşflər ağlasığmaz görünür.
Bundan başqa, İsak Nyutonun (1643-1727), Mendeleyevin (1834-1907), Eynşteynin (1879-1955), başqa kainatlar haqqında ən aydın təəssürat yaradan yazıçı Herbert Uellsin (1866-1946) yadplanetli və ya başqa zamandan gəlmiş zaman yolçuları olduğu iddia edilir.
UNO tarixdə
Yadplanetlilər barədə məlumatlar
hələ qədim şumer, hind və Misir yazılı abidələrində yer alıb. Bəzi alimlər Qədim
Misirdə 5-6 min əvvəl piramidaların inşası zamanı yadplanetlilərin köməyindən
istifadə olunduğunu iddia edirlər. Piramidaların inşasında istifadə edilən
daşların hər birinin 2 ton ağırlığında olması, habelə onların divarlarında
astronavt şəkillərinin həkk edilməsi bu qənaətə gəlməyə zəmin yaradır.
Hind eposlarında
allahların "alov saçan gümüşü qablardan enib insanların arasına gəlməsi” fikri
dəfələrlə təkrar olunub və o zamanın rəssamları tərəfindən qələmə də alınıb.
Mayya qəbiləsinin də
yazılı abidələrində UNO ilə bağlı dəqiq məlumatlar var.
Antik yunan tarixçisi
Plutarx (e.ə 45-127) Dardanel ətrafında planlaşdırılmış döyüşün qəfil naməlum
obyektlərin peyda olması səbəbindən baş tutmadığını yazıb.
XI əsrdə Çin filosofu naməlum
obyekti dostu ilə bərabər görmüş və onun təsvirlərini qələmə almışdı.
1561-ci ildə Avropada – Nyunberq
şəhərində iki silindrə bənzər obyekt görünərək o dövrün rəsmi qeydlərində yer
almışdı.
Lakin istər dində göstərilən
eyhamlar, istərsə də XXI əsrin elm və texnologiyasının yüksək səviyyədə inkişaf
etməsinə baxmayaraq, UNO-larla bağlı sirlər hələ də açılmamış qalır.