Dincəlmədən yorulmaq
Yay fəsli bitmək üzrədir. Bu fəsil turizm həvəskarlarının ən çox sevdiyi fəsildir. Təbii ki, ilin başqa fəsillərində də səyahət etməyi sevənlər var, məsələn qış turizmi heç də az sevilmir. Mən bu yazımda turizmə ümumi bir nəzər salmağa çalışacam. Yox, yaradanın bizə verdiyi təbii imkanlardan yazmaq fikrim yoxdur. Hər kəs bilir ki, Azərbaycanın turizm üçün bütün təbii şəraiti var, biz süni əngəllər yaratmsaq ölkəmiz turizimdən neftdən əldə etdiyindən çox gəlir əldə edər.
Turizm
nədir? Onun hansı növləri var? Zatən bunları öyrənmək o qədər də çətin deyil, internetdə açar sözü, yəni "turizm nədir” yazıb axtarmaq kifayətdir. Mən sadəcə
onu qeyd edim ki, turizm başqa yerləri görmək, istirahət, alış-veriş etmək və.s.
məqsədlə olur. Siyahını uzatmaq, bura
müalicəni və.s. də daxil etmək mümkündür. Həm də turist tək ölkədən
xaricə gedənlərə deyilmir, var daxili, var xarici turizm. Ölkəndən xaricə
getdiyin zaman yaşadığın ölkənin burdan bir qazancı olmaz, sənin səyahətini təşkil
edən turizm şirkətinin səndən qazandığı puldan ödədiyi vergi xaric. Əgər hər
şeyi internet üzərindən etmisənsə o halda pullar getdi xaricə, necə deyərlər.
Odur ki, bunda işimiz yoxdur.
Bu yazımda
daxili turizmdən və xaricdən Azərbaycana turist kimi gəlmək imkanlarından
yazacam. Bu başdan qeyd edim ki, əgər
daxili turizmin inkişafına 100 ballıq qiymətləndirmədən yanaşsaq 10 – dan artıq
qiymət vermək olmaz, bu qiyməti isə əhalinin
imkanlı təbəqəsi üçün yaradılmış şəraitə görə vermək mümkündür. Bəli, Azərbaycanda
yaşamıram, ancaq təkcə sosial şəbəkələrdə yazılanlara nəzər salmaq, internetin
xidmətlərindən istifadə edib Azərbaycandakı otellərin qiymətlərinə baxmaq bir nəticəyə
gəlməyə kifayət edir. Demək olar ki, əksər otellər yüksək ulduzlu və təbii ki,
baha qiymətədir. Bu, xüsusən regionlarda daha çox hiss olunur. Zatən daxili
turizmin əsas yükü şəhərdə yaşayanların məzuniyyət vaxtlarında (işləri varsa)
regionlara istirahətə gedənlərin üzərinə düşür. Bəlkə infrastrkuturda, məsələn
yolların təmirində və.s. bir inkişaf var, buna sözüm yox. Ancaq istirahət etmək istəyənlərin və buna az-çox
imkanı olanların Azərbaycanın rayonlarını deyil, ən azından yaxın Türkiyəni və
Gürcüstanı seçdiyini heç kimə sirr deyil. Hörmətli məmurlarımız bunun səbəblərindən də bilirlər,
buna heç bir şübhəm yoxdur. Sadəcə onlara bir şey təəccüblü gələ bilər ki, bir
gecəsi 80-100 manat olan oetellərə nə üçün baha deyilməlidir? Onlar da özlüyündə
haqlıdırlar, çalışın bu qiymətlərə bir də onların gözündən baxın. İndi necə,
sizə baha gəldimi? İnanmıram. Yeri gəlmişkən
aidiyyatı şəxslərə bir müraciət də ünvanlamaq istərdim: cənablar, ölkədə 2-3
ulduzlu, hətta 1 ulduzlu, hətta mən deyərdim ki, ulduzu belə olmayan otellərə də
ehtiyac var. İnanın ki, ölkədə hər kəs zəngin deyil. Mümkünsə, obrazlı desək, arada güzgü önündən çəkilib pəncərədən bayıra
da baxın.
Bəs ölkəmizə turist kimi gələmək imkanları necədir?
Yenə də statistik rəqəmlərlə sizi yormaq
fikrində deyiləm. Sabah qalxıb Azərbaycana gəlsəm mənu də turist kimi
qeydiyyata alacaq və statistik rəqəmləri dəyişəcəklər. Baxmayaraq ki, mənim
orda öz evim var, mən yenə də turist hesab olunacam. Mənim kimi də dünyanın müxtəlif
ölkələrinə səpələnmiş on minlərlə soydaşımız, səhv etmirəmsə, hələlik Rusiya və
Gürcüstan vətəndaşları xaric (əslində paradoksur, həm "Azərbaycan
Respublikasının vətəndaşlığı haqqında” qanuna edilmiş dəyişiklikliyi, həm viza
verilmə qaydalarını sərtləşdirməklərini əsasən Rusiya ilə, ordan gələ biləcək təhlükə
ilə əlaqələndirirlər, ordan gəliş gedişə isə viza tələb olunmur). İnsaf naminə
deyim ki, kimin ki, Azərbaycanın ümumvətəndaş pasportu varsa onun viza almasına
ehtiyac yoxdur. Şərtlər nə qədər zor
olsa belə bizlər Azərbaycanda yaşayan doğmalarımızı, vətənimizi görmək üçün viza alıb ora gələcəyik. Bəs bir əcnəbi
ölkəmizə turist kimi gəlməsi üçün nə etməlidir? Yuxarida da qeyd etdiyim kimi
ölkəmizdə otellər hədsiz dərəcədə bahadır və bu sıravi bir avropalının ora
turist kimi gəlməməsi üçün əsas ola bilər. Hər kəsə məlumdur ki, avropalıların
turist kimi getmələri üçün ölkə seçim imkanları genişdir. Deyək ki, bir
niderlandlı 100 avro ödəməklə Parisə gedib qayıda bilər ki, bu qiymətə
avtobusla Niderlandın müxtəlif şəhərlərindən Parisə gediş-gəliş, 2 gecə 3 gün
oteldə qalma (təbii ki, ulduzunu aşağı otel),
səhər yeməyi və bir gün Parisdə avtobus turu daxildir. Yaxud da 400-500 avro ödəməklə Türkiyədə 4-5*
oteldə qalmaqla, hər şey daxil (o cümlədən yol pulu), istirahət edə bilərlər. Təbii ki, heç bir viza problemi də yaşamadan.
Baxaq Azərbaycana turist kimi getməyin şərtlərinə.
Ən ucuz otellərdə bir gecənin qiyməti bir adam üçün 80-100 manat arası dəyişir
ki, qiymətə oteldə qalma və ən yaxşı halda səhər yeməyi daxil olur. Bir həftəlik
oteldə qalmaq 800-1000 manat gərəkdiyini
hesablamaq o qədər də çətin deyil. Öncələr vizanı aeroportda almaq mümkün idisə,
son illərdə bunun üçün Azərbaycan Respublikasının yaşadığın ölkədəki səfirliyinin
konsulluq idarəsinə müraciət etmən gərəkdir. İlk vaxtlar bir həftəyə verilən
viza üçün indi iki həftə vaxt tələb olunur.
Anlaşılan, bir gedib sənədləri vermək, bir də gedib almaq lazımdır (Niderland
o qədər də böyük ölkə deyil, təsəvvür edin ki, böyük ölkələrdə bu nə qədər çətinlik
yarada bilir). Təbii ki, viza üşün də dövlət rüsumu ödəmən gərəkdir ki, bu da
60 avrodur. Bakıya gediş-gəliş təyyarə
bileti isə aşağı-yuxarı 450-650 avro arasında dəyişir (bahalıları da var). Demək
ki, Azərbaycana turist kimi getmək istəyən
biri (3* oteldə qalmaq şərti ilə) hardasa 1300-1500 (bura
aeroprt-otel-aeroport transfer xərcləri, ekskursiya və.s. daxil deyil)
avrosundan keçməlidir. Bura viza almaq üçün konsulluğumuza gedib gəlmək xərcini
(bunun üçün bu istiqamətdə fəaliyyət göstərən müxtəlif şirkətlərin xidmətlərindən
də istifadə etmək olar ki, buna görə də pul ödəmən lazım olduğunu bilməmək sadəlöhvlük olardı) də daxil etsək,
məbləg bir az da artır. Hələ viza almaq üçün sərf etdiyi vaxt itkisi, bir başa
təyyarə reysinin olmaması və bunun üçün də hər istiqamətə bir gününü itirmən ayrı mövzunun söhbətidir. Bir də ki, tək bu olsa idi nə vardı? Yeni
qanuna görə Azərbaycana gedən hər kəs uç gün müddətində Azərbaycan Respublikası
Dövlət Miqrasiya Xidmətində qeydiyyatdan keçməlidir, əks halda cərimə olunacaq.
Doğrudur, bunu internet üzərindən (www.migration.gov.az saytına daxil olaraq məlumat əldə
edə bilərsiz) də etmək olar. Ancaq dəyərmi?
Turist kimdir? Yuxarıda da qeyd etdim ki, tərifini yazmayacam. Ancaq hamı bilir
ki, turistlər əsasən dincəlmək istəyənlərdir. Bu başdan bu qədər yorularaq dincəlməyə
getməyinə dəyərmi, hələ başqa ölkələrdə qat-qat ucuz və zəhlə tökən prosedurlar
olmadan dincəlmək imkanı olduğu halda. Hər
bir ölkə turizmini inkişaf etdirmək üçün şərtləri sadələşdirdiyi
halda biz mürəkkəbləşdiririk. Bəhanəmiz
isə həmişə var, təxribatlardan sığortalanmaq üçün, düşmənlərimiz çoxdur və.s.
İndi siz deyin, siz azərbaycanlı olmasa idiniz, ora turist kimi gedərdinizmi?
Vüqar Abbasov.
Niderland.
P.S. Mən bu
yazını uzada, müxtəlif faktlar da gətirə bilərdim.
Uzun-uzadı vaxtınızı almaq istəmədim. Mənim turzim mövzusuna yanaşmam tək bir
jurnalistin, bir vətəndaşın yanaşması deyil.
Təvazokarlıqdan kənar səslənsə belə mən bu yazını turizmi bilən, uzun
müddət bu sahədə çalışmış və hətta turizm şirkətlərindən birinə rəhbərlik etmiş
biri kimi yazdım.