Bölgələrdə insan alveri qurbanları üçün mərkəzlər yaradılır
İnsan alveri qurbanları üçün bölgələrdə sosial reabilitasiya mərkəzlərinin yaradılması nəzərdə tutulur. Bu barədə Əmək və Əhalinin Sosial Müdafiəsi Nazirliyindən (ƏƏSMN) Adalet.az-a daxil olan məlumata görə, aidiyyatı qurumlarla birgə insan alveri qurbanları üçün regionlarda sosial xidmət və yardım mərkəzlərinin, sığınacaqların yaradılması, onların hüquqi, tibbi, psixoloji, sosial və digər yardımlarla təmin edilməsi üçün müvafiq tədbirlər həyata keçirəcək.
Qeyd edək ki, bu istiqamətdə görülən işlər Azərbaycan
Respublikası Prezidentinin 2014-cü il 24 iyul tarixli Sərəncamı ilə
təsdiq edilmiş "Azərbaycan
Respublikasında insan alverinə qarşı mübarizəyə dair 2014-2018-ci illər üçün
Milli Fəaliyyət Planı”nın həyata keçirilməsi ilə bağlı Tədbirlər Planına əsasən aparılır.
Plana əsasən, insan
alverinin qurbanı olma riskinin azaldılması məqsədi ilə həssas qrupa aid qadın
və uşaqların hüquqi və sosial müdafiəsinin gücləndirilməsi istiqamətində
təkliflərin hazırlanması, uşaq əməyinə dair beynəlxalq konvensiyalardan,
həmçinin Beynəlxalq Əmək Təşkilatının sənədlərindən irəli gələn öhdəliklərin
icrası üzrə tədbirlərin gücləndirilməsi, sosial cəhətdən həssas ailələrin və
daimi yaşayış yerindən məhrum şəxslərin yerli icra hakimiyyəti orqanları
tərəfindən qeydiyyata götürülməsi və müvafiq tədbirlərin görülməsi üçün
aidiyyəti orqanlara yönəldilməsi təmin olunacaq. Sənəddə insan alverinin potensial qurbanlarının ictimai
faydalı əməyə cəlb edilməsi, məşğulluğun təmin edilməsi, insan alverindən
zərər çəkmiş şəxslərin işə götürülməsi üçün sahibkarların həvəsləndirilməsi
məqsədilə müvafiq tədbirlərin həyata keçirilməsi nəzərdə tutulur.
Belə
ki, xüsusi
müəssisələrdə (sığınacaq və yardım mərkəzləri) qurbanlara, tibbi, psixoloji və
digər yardımların göstərilməsinə məsul olan mütəxəssislərin sayının artırılması
və onlara müvafiq təlimlərin keçilməsi, bu qrup insanların əmək
bazarında rəqabət qabiliyyətinin artırılması, onların yeni peşələrə
yiyələnməsinə yönəlmiş kursların təşkili, məşğulluq probleminin həlli
istiqamətində tədbirlər görüləcək.