Millət vəkili Fazil Mustafa özünün Feysbuk sosial şəbəkəsindəki səhifəsində Qafqaz Müsəlmanları İdarəsini sərt şəkildə tənqid edib.

Ramazan bayramının bütün müsəlman ölkələrində iyulun 28-də keçirildiyini deyən F.Mustafa İran və Azərbaycanda bir gün sonra, yəni iyulun 29-da keçirildiyini deyib.

Millət vəkilinin sözlərinə görə, Azərbaycanın İranın kopyaçısına çevrilməyi utancverici bir haldır:

"Dünyanın hər yerində bayram namazı 28 iyuldadır. Yalnız İranda və Azərbaycanda 29 iyula təyin olunub. Deyəsən, Qafqaz Müsəlmanları Ruhani İdarəsinin fitvası QUM saatına baxılaraq yazılıb, Şamaxı Rəsədxanasının teleskoplarının da gözünü QUM tutub. Nəinki güneyimiz, elə quzeyimiz də hələ ki, İran dininin mənəvi müstəmləkəsi olaraq qalır. Kim istəyirsə, gedib öz namazını İran ayətullahlarının arxasında qılsın. Müstəqil bir dövlətin İranın kopyaçısına çevrilməyi utancverici bir haldır”.